काठमाडौं । काठमाडौंमा जारी क्यान इन्फोटेक मेलाको तेस्रो दिन स्टार्टअप कम्पनी र साना स्किमका स्टलहरुमा ग्राहकको चहलपल बढी देखिएको छ । क्यान इन्फोटेकमा अवलोकनकर्तालाई लक्षित गरी विभिन्न ब्राण्डले छुट र अफरको घोषणा जारी राखेका छन् । त्यस्ता स्टलहरुमा अवलोकनकर्ताको भीड लागेको छ । त्यस्तै स्टार्टअप कम्पनी र रोवर्टिक्समा पनि मानिसले बढी चासो देखाएका छन् ।
यो वर्षको क्यान इन्फोटकमा स्टार्टअप र इन्नोभेसनलाई विशेष महत्व दिइएको आयोजकले जनाएको छ । नयाँ नयाँ प्रविधिको प्रयोगमार्फतको सेवालाई नै उपभोक्ताले पनि रुचाएका छन् । । स्टार्टअप र नवीनतम प्रविधिमा आधारित व्यवसायलाई प्रवद्र्धन गर्न भन्दै क्यानले विभिन्न विश्वविद्यालय र कलेजमा पत्राचार गर्दै निःशुल्क स्टल उपलब्ध गराएको छ ।
क्यानका केन्द्रिय सचिव चिरञ्जिवी अधिकारीले अन्य स्टलको तुलनामा स्टार्टअप र इन्नोभेसनका स्टल जानकारीमूलक भएको बताए । प्रदर्शनीमा विशेषगरी विद्यालय व्यवस्थपन सम्बन्धी सेवा दिने स्टार्टअप, टिकेटिङ तथा युटिलिटी पेमेन्ट, रगत संकलनमा सहयोग गर्ने जस्ता इन्नोभेटिभ आइडियाहरु राखिएका छन् ।
प्रदर्शनीमा स्मार्ट घर एप, ई–वेस्ट कलेक्सन, मेरो यात्रा, फाइनेन्सियल नोटिसेस, सोसाइटी डेभलपमेनट डट ओआरजी, स्मार्ट केयर डट कम, काठमाडौं अग्र्यानिक्स, सजिलो मर्मत सेवा, स्कील सेवा, इ–टिकेट नेपाल, सर्वनाम सफ्टवेयर, भेदा, हाम्रो लाइफ बैंक, डिजिटल नेपालजस्ता स्टार्टअपको स्टल छन् ।
क्यान इन्फोटकमा स्टार्टअप र इन्नोभेसन पभेलियनमा करिब २० वटा स्टल राखिएका छन् जसमा विद्यार्थी र व्यवसायीले नवीनतम सोच भएका उत्पादन र सेवाबारे जानकारी दिएका छन् ।
‘स्टार्टअप तथा इनोेभेसनसम्बन्धी हामीकहाँ राम्रो ज्ञान छैन । यसकारण अन्य स्टलको तुलनामा यी स्टलमा अवलोकनकर्ताको संख्या कम छ,’ अधिकारीले भने, ‘रुची हुनेहरुले भने यस्ता स्टलमा गएर नवीनतम उत्पादन तथा सेवाबारे जानकारी लिइरहेका छन् । स्टार्टअप र इन्नोभेसनलाई प्रवद्र्धन गर्न क्यान इन्फोटेकमा यस्ता स्टललाई प्राथमिकता दिइएको अधिकारीले बताए ।
केही मोबाइल ब्राण्डले मेलामा ५० प्रतिशतसम्म छुट दिइरहेका छन् । छुट र अफर घोषणा गरिएका स्टलमा प्रयोगकर्ताको आकर्षण देखिएको छ । यो वर्षको क्यान इन्फोटेकमा साइबर सुरक्षा सम्बन्धी अध्ययन पनि गरिएको आयोजनाले जनाएको छ ।
क्यान महासंघले सेन्टर फर साइबर सेक्युरिटी रिचर्स एण्ड इन्नोभेसन काठमाडौंसँगको सहकार्यमा साइबर सुरक्षा सम्बन्धी अनुसन्धान गरिरहेको हो । इन्फोटेकमा स्टल राखेर अवलोकनकर्ताहरुमाझ साइबर सुरक्षा सम्बन्धी ज्ञानको बिषयमा अनुसन्धान गरिएको हो ।
अनलाइन गेमको प्रतिस्पर्धा
क्यान इन्फोटेकको क्रममा शनिबार इन्टरनेटमा आधारित खेल ई–स्पोर्ट्सको विभिन्न विधामा प्रतिस्पर्धा भएको छ । ओसिएन कम्युटरले अनलाइनमार्फत प्रतिस्पर्धा गराएको हो । एमएसआई ई–स्पोर्ट च्याम्पियनसिप २०२० नाम दिएर प्रतियोगिता गराइएको हो ।
च्याम्पियनसिपमा दोटा टु र सीएसओ गेमको प्रतिस्पर्धा गराइएको आयोजकले जनाएको छ ।
दुवै खेलमा विजेतालाई २५ हजार, दोस्रो हुनेलाई १५ हजार र तेस्रो हुनेलाई १० हजार रुपैयाँ पुरस्कारको व्यवस्था छ । दुवै गेममा ८–८ वटा टोलीले प्रतिस्पर्धा गरिरहेका छन् ।
