योजना आयोगका उपाध्यक्ष कँडेलले भने, ‘सेयर बजार अस्वाभाविक बढ्यो, नियन्त्रण गर्नुपर्छ’

मुख्य समाचार

गृहपृष्ठ
मुख्य समाचार

योजना आयोगका उपाध्यक्ष कँडेलले भने, ‘सेयर बजार अस्वाभाविक बढ्यो, नियन्त्रण गर्नुपर्छ’

क्यापिटल नेपालमंगलबार, मंसिर २३, २०७७

काठमाडौं । सेयर बजार निरन्तर उकालो लागिरहेका बेला राष्ट्रिय योजना आयोगका उपाध्यक्ष प्रा.डा पुष्पराज कँडेलले बजारलाई नियन्त्रण गर्नुपर्ने बेला आएको बताएका छन् । क्यापिटल नेपालसँगको विशेष कुराकानीमा कँडेलले बजार अस्वाभाविक रूपमा बढेको र यसले जोखिम निम्त्याउने भएकाले बेलैमा बजारलाई ‘कन्ट्रोल’ गर्नुपर्ने बताएका हुन् ।

नेकपा महासचिव विष्णु पौडेल अर्थमन्त्री भएर आएदेखि नै बजार निरन्तर उकालो लागेर नयाँ उचाइ चुमिसकेको छ । पछिल्ला केही दिनयता बजारमा अस्वाभाविक रूपमा पैसा भित्रिएपछि नियामक निकाय धितोपत्र बोर्डले पनि अनुसन्धान अघि बढाएको छ ।

त्यसैगरी, केन्द्रीय बैंकले पनि हालको मार्जिन सीमालाई परिवर्तन गर्न लागेको छ । ७० प्रतिशतको सीमालाई घटाउने, १२० को मूल्यांकनमाथि हेरफेर गर्ने संकेत देखिएको छ । दुईवटा निकायले सेयरलाई नियन्त्रण गर्न खोजिरहेका बेला आयोगका उपाध्यक्ष कँडेलले पनि त्यस्तै अभिव्यक्ति दिएका हुन् ।

सोझा र साना लगानीकर्ता फस्न सक्नेतर्फ सचेत गराउँदै यो गतिमा बजारलाई बढ्न दिन नहुने उनको भनाइ छ । ‘ठूला लगानीकर्ता उम्किहाल्छन्,’ उनले भने, ‘साना लगानीकर्ता डुब्न सक्छन् ।’

केन्द्रीय बैंकले सेयर कर्जामा केही कडाइ गर्ने संकेत गरेपछि आइतबार १२३ अंकले बजार घटेको थियो । तर, अर्थमन्त्री पौडेलले नेपाल राष्ट्र बैंकका गभर्नर महाप्रसाद अधिकारीलाई फोन गरेर तत्काल सेयर कर्जाको सीमालाई नचलाउने भने पछि सोमबार बजार पुरानै लयमा फर्किएको थियो ।

प्रकाशित मिति: मंगलबार, मंसिर २३, २०७७ १२:४५

प्रतिक्रिया दिनुहोस्