माजिद मुनिर साह
स्टोर म्यानेजर, दामिलानो इटालिया रोसो बोर्निलियो
सरकारले असार २ दुई गतेबाट केही लकडाउन खुकुलो बनाएसँगै तपाईहरुले पनि धमाधम पसल खोल्नु भएको छ । सुरक्षाको प्रबन्ध कसरी मिलाइएको छ ?
दामिलानो इटालिया रोसो बोर्नेलियो अन्तराष्ट्रिय ब्रान्ड हो र यसले विश्वभर नै पसल खोलेको छ । उनीहरुले सुरक्षाको मापदण्ड, नीति निर्देशन बनाएर पठाएका छन्, सोही अनुसार यहाँ पनि सुरक्षाको व्यवस्था मिलाएर पसल खोलिएको छ ।
ग्राहकहरु पसल भित्र छिर्ने बेलामा स्यानिटाइजर छर्कने, तापक्रम चेक गर्ने गरिन्छ । ट्रायल रुम दुई पटक स्यानिटाइज गर्ने । ग्राहकले लुगा छान्यो वा छोयो भने, त्यसलाई पनि स्यानिटाइज गर्ने । जुत्ता लगायो भने त्यसलाई पनि स्यानिटाइज गर्ने, जति सामान ग्राहकले छुन्छन् वा प्रयोग गर्छन्, ती सबैलाई स्यानिटाइज गर्ने गर्छौ ।
कम्पनीले स्प्रे पठाएको छ । स्यानिटाइजर पनि पठाएको छ । त्यसलाई प्रयोग गर्छौ । त्यसैगरी ग्राहकले मास्क नलगाइ आएको रहेछ भने, त्यसलाई निशुल्क मास्क पनि दिन्छौं । हाम्रो स्टोरलाई सुरक्षाको दृष्टिकोणबाट कुनै कमी हुन दिएका छैनौ ।
दामिलानो आफैले सुरक्षाका गाइडलाइन बनाएर पठाउँछ ?
हो, दामिलानो इटालिया आफैले मापदण्ड बनाएर पठाएको छ । उनीहरुले बनाएको गाइडलाइनलाई अनुशरण गरेर पसल सञ्चालन गरेका छौं । उनीहरुले डेमो बनाएर पठाएको छ । कसरी उभिने, गेटमा स्यानिटाइजर कहाँ राख्ने ? मास्क कहाँ राख्ने ? स्प्रे गर्ने मेसिन नै पठाएको छ ।
अर्को कुरा पनि यहाँ राखौ, हामीले आफ्नो खुसीले पसल खोल्न पाउँदैनौ । पसल बन्द गराउँदा पनि हामीले उनीहरुलाई जानकारी दिन्छौं । सरकारले नखोल्नु भनेपछि हामीले हाम्रो पसल खोल्न पाउँदैनौं ।
पसल खोलिसक्नु भएको छ । ग्राहकहरु सामान हेर्न मात्रै आउँछन्, कि सामान पनि किन्छन ?
ग्राहकहरु आउँछन्, हेर्छन्, जान्छन् । तर, सामान बिक्री हुँदैन । मान्छेले सामान किन्दैनन् । किनभने, लकडाउनका कारण उनीहरुको आम्दानी खुम्चिएको छ । आम्दानी नै नभए पछि कसरी सामान किन्न सक्छन् ?
अहिले पसल खोलेर सामान बेच्ने भन्दा पनि पसलको सरसफाइ गर्ने, सामान डिस्प्ले गर्ने मात्रै काम भइरहेको छ । ग्राहकलाई हाम्रो स्टोर सुरक्षित छ भनेर विश्वास दिलाइरहेका छौं । विस्तारै बजारले पिकअप लिन्छ भन्ने आशा छ ।
तपाईको स्टोरमा यो सिजनका सामान आइसकेका छन् ?
हामीले लकडाउन अघि नै सामान मगाएका थियौं । तर, बीचैमा लकडाउन भयो र वीरगन्जमै रोकिएर बसेको थियो । जब सरकारले लकडाउनलाई केही खुकुलो बनायो, त्यसपछि उक्त सामानहरु सबै काठमाडौं लगायत विभिन्न सहरमा पुर्याइसकेका छौं । अहिले हाम्रा सम्पूर्ण स्टोरमा नयाँ सामान मात्रै राखिएको छ ।
