×

हिउँदेबाली लगाउन ढिलो भएकाले मूल्य निर्धारण नहुँदै सर्लाहीका किसानद्वारा उखु काट्न सुरु

images

सर्लाही । सर्लाहीका उखु उत्पादक किसानले उखुको मूल्य निर्धारण नहुँदै धमाधम उखु काट्न थालेका छन् । खेतमा भएको उखु निकालेर हिउँदेबाली लगाउन ढिलो भएकाले उखुको मूल्य निर्धारण नहुँदै जिल्लाका किसानले उखु काट्न थालेका हुन् ।

सरकारले उखुको समर्थन बिक्री मूल्य निर्धारण नगरेसम्म हतार गरेर किसानले उखु काट्न नहुने नेपाल उखु उत्पादक महासङ्घका अध्यक्ष कपिलमुनि मैनालीले बताए ।  उनका अनुसार उखुको मूल्य निर्धारण गर्न भन्दै केही दिनअघि भएको त्रिपक्षीय छलफल बिना निष्कर्ष टुङ्गिएको र अहिलेसम्म उखुको मूल्य निर्धारण नभएपनि जिल्लाका उखु उत्पादक किसानले उखु काट्न थालेका हुन् ।

उखु उत्पादक किसानले क्रसिङ सिजनका लागि उखुको न्यूनतम मूल्य प्रतिक्विन्टल  ६ सय ८० रुपैयाँ हुनुपर्ने भए पनि तत्कालका लागि ६ सय ४० मूल्य कायम गरेर उद्योग सञ्चालन गर्न सुझाव दिएको थियो । यता उद्योगले भने सरकारले पछि निर्धारण गरेको मूल्यमा उखु उत्पादक किसानलाई भुक्तानी गर्ने गरी उखु क्रसिङको तयारी थालेको इन्दुशङ्कर चिनी उद्योगका उखु प्रबन्धक योगनारायण रजकले बताए ।

मूल्यमा सहमति जुट्न नसके पनि चिनी उद्योगले यसै सातादेखि क्रसिङ गर्ने गरी उत्पादक किसानलाई धमाधम उखु कटाउने चलान पुर्जी वितरण गर्न थालिसकेका छन् ।  मूल्य निर्धारण भइनसकेकाले अगाडि नै उखु बिक्री गर्दा पछि किसानलाई भुक्तानीमा समस्या पर्ने अगुवा किसान राजकुमार उप्रेतीले बताए ।

विभिन्न उखु उत्पादक किसान सम्बद्ध सङ्घ–सङ्घठनले यस क्रसिङ सिजनका लागि उखुको मूल्य प्रतिक्विन्टल  ६ सय ८० रुपैयाँभन्दा माथि हुनुपर्ने र त्योभन्दा कम मूल्यमा सहमति गर्न नसकिने अडान लिएका छन् ।  पुसको १५ हुनै लाग्दा धेरै किसानको उखु खेतमा सुक्न थालिसकेकाले किसानले धमाधम उखु काट्न थालेका हुन् । गएको वर्ष सरकारले उखुको प्रतिक्विन्टल मूल्य  ५ सय ३६ रुपैयाँ ५६ पैसा कायम गरेको थियो । 

त्यसमा उद्योगीले  ४ सय ७१ रुपैयाँ २८ पैसा र सरकारले उखु किसानलाई अनुदानस्वरूप ६५ रुपैयाँ २८ पैसा भुक्तानी गरेको थियो । जिल्लाको इन्दुशङ्कर चिनी उद्योग हरिवन, महालक्ष्मी सुगर मिल बगदहले क्रसिङ सुरु गरेका छन् भने अन्नपूर्ण चिनी उद्योग किसानको भुक्तानी गर्न नसकेर बन्द रहेको छ ।

सोमबार १२ पुस २०७८ ०३:०३ PM मा प्रकाशित

प्रतिक्रिया