×

बेलहिया नाकामा पर्यटकलाई स्वागत गर्दै गृहमन्त्री खाण

images

भैरहवा  । इजरायलका म्याक ढाका टोपीमा ठाटिँदा मख्ख देखिनुहुन्थ्यो । विश्व पर्यटन दिवसको अवसरमा बेलहियामा पहिलो पर्यटकको रुपमा भित्रिएका म्याक नेपालीको स्वागतले खुसी भएका थिए  । 

विश्व पर्यटन दिवसको अवसरमा नेपाल-भारत सीमा बेलहियामा भारत हुँदै आउने पर्यटकलाई गृहमन्त्री बालकृष्ण खाणले मंगलबार यहाँ स्वागत गरेका छन् । भारत दिल्लीका लालाराम र केरलाका राकेशकुमार कच्छ पहिलो भारतीय पर्यटकको रुपमा आज नेपाल भित्रिएको हुन् । यस्तै इजरायलका म्याक, क्यानडाका आरोन र चीनकी जुलाईलाई पनि मन्त्री खाणले स्वागत गरे । 

त्रिचालिसौं विश्व पर्यटन दिवसको अवसरमा समारोह समिति गठन गरी बेलहिया नाका हुँदै नेपाल भित्रिने पर्यटकलाई स्वागत गरिएको हो । नेपाल पर्यटकको लागि खुला रहेको र पर्यटकको स्वागत गर्न आतुर रहेको भन्ने सन्देश दिन ‘पर्यटनमा पुनर्विचार’ भन्ने नारासहित दिवस मनाइएको छ । 

विश्व पर्यटन दिवसको दिनदेखि सिद्धार्थ होटल संघले भैरहवा तथा यस आसपासका सम्पूर्ण होटलमा नेपाली तथा भारतीय पर्यटकलाई २० प्रतिशत छुटको घोषणा गरेको छ । होटलमा उपलब्ध कोठा, खानामा यो छुट प्रदान गरिएको सिद्धार्थनगर होटल संघका अध्यक्ष चन्द्रप्रकाश श्रेष्ठले जानकारी दिए । 

यस्तै आज स्वागत गरिएका पाँच पर्यटकलाई पनि उनीहरुको गन्तव्यसम्म समारोह समितिले नै पुर्याउने र उनीहरुका आजको खाना खर्च एवं होटलको प्रबन्ध पनि समितिले नै गर्ने श्रेष्ठले जानकारी दिए । भारतको केरलाबाट नेपाल भ्रमणमा आएका राकेशकुमार कच्छ नेपालीको स्वागत, वेषभूषा र संस्कृतिले आफूलाई आकर्षित गरेको बताए। “भारत छोड्ने बित्तिकै नेपालीहरुबाट पाएको मायाले हर्षविभोर भएको छु”, उहाँले भन्नुभयो, “मेरो गाउँठाउँ पुगेर नेपालीहरुको यो आतिथ्यताबारे जानकारी गराउनेछु ।”

विदेशी पर्यटकको स्वागत कार्यक्रममा गृहमन्त्री खाणले नेपाल आउने भारतीय पर्यटकलाई पनि अन्य पर्यटकझै सम्मान गर्नुपर्ने बताए । “वेषभूषा मिल्छ, रहनसहन मिल्छ भनेर भारतीयलाई हेला गर्नुभएन”, खाणले भने, “उनीहरु पनि हाम्रा लागि विदेशी पाहुना हो, अन्य पाहुनाले जस्तो सम्मान उनीहरुले पनि पाउनुपर्छ ।”

खाणले नेपालको समग्र विकासको लागि नेपालका सम्पदाको रक्षा र त्यसको उपयोगको साथै पर्यटन व्यवसायको प्रवर्द्धन नेपाललाई समृद्ध बनाउने मूल आधारशीला भएको बताए । उनले सरकार नेपालको पर्यटन विकासमा संवेदनशील भएको बताए । अतिथिको सम्मान गर्ने नेपालीको संस्कृति नै रहेको उनले जिकिर गरे । 

बेलहिया नाकाबाट नै नेपालमा सडक मार्ग हुँदै सबैभन्दा बढी पर्यटक भित्रिने भएकाले बेलहियामा अध्यागमन, भन्सार कार्यालय, पर्यटक सूचना केन्द्र, बाटोलगायतका पूर्वाधार अन्तर्राष्ट्रियस्तरको बनाइने उनले बताए । बेलहियामा निर्माण सम्पन्न हुन बाँकी रहेको बाटोलाई पनि अबिलम्व निर्माणको व्यवस्था मिलाउन रुपन्देहीका प्रमुख जिल्ला अधिकारीलाई निर्देशनसमेत दिए। 

उनले लुम्बिनीमा रहेका विद्युतीय बस तत्काल सञ्चालन गर्न निर्देशन दिए । बस सञ्चालनमा आर्थिक कमी आए आफूले पाउने सुविधाबाट तिर्ने उनले प्रतिबद्धता जनाए। खाणले भोलि ११ बजेसम्म बस सञ्चालनको औपचारिक निर्णय हुने गरी काम गर्न प्रमुख जिल्ला अधिकारीलाई निर्देशन दिए। 

मङ्गलबार ११ असोज २०७९ ०४:३२ PM मा प्रकाशित

प्रतिक्रिया