बुधबार, साउन १३ २०७८ ०९:३० AM

×

नेपाल मेडिसिटी र यती एयरलाइन्सको सहकार्यमा एयर एम्बुलेन्स सेवा

images

काठमाडौं । नेपाल मेडिसिटी अस्पताल र यती एयरलाइन्स तथा तारा एयरबीच एयरक्राफ्टमार्फत बिरामीहरूको उद्धार गर्ने सहकार्यका लागि मंगलबार द्विपक्षीय सम्झौता भएको छ । अस्पतालका महाप्रबन्धक विजय रिमाल र एयरलाइन्सका प्रशासन प्रमुख अञ्जन बङगामी सम्झौतापत्रमा हस्ताक्षर गरेसँगै सम्झौता कार्यान्वयनमा आउने भएको हो ।

हाल देशमा हेलीकोप्टरबाट तथा चार्टर्ड फ्लाइटबाट बिरामीहरूलाई स्थानान्तरण गर्ने गरिएकोमा अब यती एयरलाइन्स तथा तारा एयरले नियमित एयरलिफ्ट  एम्बुलेन्स सेवा उपलब्ध गराउने भएको छ । यस व्यवस्थाले बिरामीहरूलाई रात्रिकालिन उद्धार उडान गर्नसमेत सहज हुने भएको हो । 

नेपाल मेडिसिटी अस्पतालले बिरामीहरूलार्ई हवाई तथा ग्राउण्ड एम्बुलेन्समार्फत आकस्मिक तथा उद्धारमा गुणस्तरीय सेवा प्रदान गर्दै आएकोमा यतीसँगको सहकार्यले यो सेवा थप विस्तारित हुने आशा अस्पतालका महाप्रबन्धक विजय रिमालले राखेका छन् । 

उनका अनुसार अस्पतालद्वारा एयरलाइन्सका उडानदल तथा विभिन्न स्थानका ग्राउण्ड ह्याण्डलिङ कर्मचारीलाई प्री–हस्पिटल केयर अर्थात अस्पताल आउनुपूर्वको प्राथमिक उपचार र आकस्मिक उद्धारका विषयमा प्रशिक्षण प्रदान गरिनेछ ।  

यती एयरलाइन्सका प्रवक्ता सुदर्शन बर्तौलाका अनुसार नेपाल मेडिसिटी अस्पतालसँगको सहकार्यले हाम्रा उडानसेवा उपलब्ध हुने स्थानहरूबाट आकस्मिक उपचार तथा एयरलिफ्ट गरी थप उपचारको लागी आवश्यक हुने बिरामीहरूको आवश्यकताअनुसार जुनसुकै समयमा विमानलाई तुरुन्तै एयर एम्बुलेन्समा परिणत गरी विशेष सेवा उपलब्ध हुनेछ । 

साथै, आवश्यक परेको खण्डमा एकभन्दा बढी बिरामी र बिरामीका पक्षलाई उपचारका लागि स्थानान्तरण गर्न सक्षम रहेको उनको भनाइ छ । यस महामारीको विषम परिस्थितीमा यस प्रकारको सेवाले दुर्गम क्षेत्रका जनताले समयमै उपचार पाउन सहज हुने उनले  बताए । 

देशैभरका नागरिकसम्म उच्चस्तरीय सेवा प्रदान गर्ने लक्ष्य राखेको अस्पतालका लागि यस सम्झौताले विशेष भूमिका खेल्न सक्ने जनाएको छ । आकस्मिक उद्धारका लागि दूरदराजमा समेत यती एयरलाइन्सको यस सेवाबाट सहज तथा सहुलियत सेवा प्रदान गर्ने अवसर सिर्जना हुने विश्वास एयरलाइन्सले लिएको छ । 

मङ्गलबार ५ साउन २०७८ १०:०१ PM मा प्रकाशित

प्रतिक्रिया