ब्याजदरको विषयमा बैंकर विभाजित, ६० प्रतिशत सीईओ नबढाउने, संघका अध्यक्ष बढाउने पक्षमा

बैंकिङ

गृहपृष्ठ
बैंकिङ

ब्याजदरको विषयमा बैंकर विभाजित, ६० प्रतिशत सीईओ नबढाउने, संघका अध्यक्ष बढाउने पक्षमा

क्यापिटल नेपालसोमबार, कात्तिक २९, २०७८

काठमाडौं । ब्याजदर बढाउने विषयमा बैंकरहरु विभाजित भएका छन् । २७ वटै वाणिज्य बैंकका प्रमुख कार्यकारी अधिकृत (सीईओ) हरुको सोमबार भएको छलफलमा ब्याजदर बढाउने विषयमा मतभेद देखिएको हो ।

छलफलमा सहभागीमध्ये ६० प्रतिशत सीईओहरु नेपाल राष्ट्र बैंक ब्याजदर वृद्धिको विपक्षमा रहेको र अहिलेको अवस्थामा बढाउन उपर्युक्त नहुने तर्क गरेका थिए । नेपाल बैंकर्स संघका अध्यक्ष तथा कृषि विकास बैंकका सीईओ अनिलकुमार उपाध्याय, एनआईसी एसिया बैंकका सीईओ रोशनकुमार न्यौपाने र नबिल बैंकका सीईओ अनिलकेशरी शाह व्यवसाय विस्तार गर्न ब्याजदर बढाउन जोडबल गरेका छन् ।

अन्य बैंकरहरुले ब्याजदर बढ्दा निक्षेप पनि नबढ्ने भएकाले यतातिर लाग्न नहुने बताइरहेका बेला उनीहरु ब्याजदर बढाउनुपर्छ भनेर तीब्र लविङ गरिरहेका छन् । छलफलमा सिद्धार्थ, कुमारी, नेपाल इन्भेष्टमेन्ट, प्रभु र हिमालय बैंकका सीईओहरुले ब्याजदर बढाएपछि आधारदर बढ्ने तर्क गर्दै नबढाउने पक्षमा देखिएका छन् ।

केन्द्रीय बैंकले आइतबार निर्देशन जारी गरी औसत ब्याजदरमा १० प्रतिशत मात्र बढाउन पाउने निर्देशन जारी गरिसकेको छ । यसपछि बैंकरहरु ब्याजदर बढाउने वा नबढाउने भन्ने विषयमा विभाजित भएका हुन् । केन्द्रीय बैंकले वाणिज्य बैंकहरुले प्रकाशन गरेको अधिकतम ब्याजदरको औसत १० प्रतिशत मात्र बढाउन पाउने व्यवस्था गरेको छ ।

बैंकहरुले मंसिर १ गतेदेखि ब्याजदर बढाउन तयारी गरेका बेला राष्ट्र बैंकले निर्देशन दिएको छ । बैंकहरुले ब्याजदर बढाउन प्रतिस्पर्धा गरिरहेका बेला कात्तिक २ गते अघिल्लो महिना सार्वजनिक भएको ब्याजदरमा १० प्रतिशत मात्र बढाउने जारी निर्देशनलाई आइतबार थप संशोधन गर्दै औसतका आधारमा बढाउन निर्देशन दिएको छ ।

प्रकाशित मिति: सोमबार, कात्तिक २९, २०७८ १३:२६

प्रतिक्रिया दिनुहोस्