कोरोना महामारीलाई परास्त गरेपछि चीनको औद्योगिक उत्पादनमा वृद्धि

उद्योग

गृहपृष्ठ
उद्योग

कोरोना महामारीलाई परास्त गरेपछि चीनको औद्योगिक उत्पादनमा वृद्धि

क्यापिटल नेपालमंगलबार, भदौ १६, २०७७

पेचिङ । चीनको आद्योगिक उत्पादन गत अगष्ट महीनामा वृद्धि भएको छ । निर्यात बजारको मागमा सामान्य गिरावट आएपनि देशभित्रको माग बढेपछि औद्योगिक उत्पादनमा वृद्धि भएको सर्वेक्षणले देखाएको छ ।

चिनियाँ तथ्याँक विभागले सोमवार सार्वजनिक गरेको मासिक खरीद सूचक (पीएमआई) मा जुलाईको भन्दा औद्योगिक सूचकमा सामान्य गिरावट आए पनि समग्रमा सुधारोन्मुख देखिएको बताएको छ । औद्योगिक सूचक गणना गर्ने पर्चेजिङ म्यानेजर्स इन्डेक्स (पीएमआई) मा जुलाईमा ५१ दशमलव १ विन्दु रहेकामा अगष्टमा ५१ मा झरेको देखिएको छ ।

कुल १०० अंकको पिएमआई विन्दु ५० भन्दा बढी भएमा औद्योगिक गतिविधि सकारात्मक रहेको मानिन्छ ।

निर्यात माग सामान्य गिरावट आए पनि त्यसको घट्ने दर निकै कम रहेको छ । यसको मापनमा ४८ दशमलव ४ बाट ४९ दशमलव १ विन्दुले सकारात्मक भएको छ ।

गत वर्षको डिसेम्बरबाट कोरोना महामारी फैलिएपछि चीनमा पहिलोपटक लकडाउन गरिएको थियो । गत मार्चमा कोरोना महामारीलाई आफूहरुले परास्त गरेको घोषणा गरेपछि चीनले औद्योगिक उत्पादनका साथै बजार खुला गर्न थालेको थियो ।

चीनको उपभोग्य मागमा पनि सुधार आएको छ तर पेचिङले चाहेझैं प्रगति हुन सकेको छैन । संयुक्तराज्य अमेरिका र अरु महत्वपूर्ण बजारमा कोरोना भाइरस संक्रमितको संख्या निरन्तर बढेपछि चीनको निर्यात बजारमा अपेक्षित सुधार आउन सकेको छैन ।

जनवरीदेखि मार्चसम्म करीब ६ दशमलव ८ प्रतिशतले खुम्चिएको चिनियाँ अर्थतन्त्र अप्रिलदेखि जुनसम्मको तीन महीनाको अवधिमा एकाएक ३ दशमलव २ प्रतिशतले वृद्धि भएको थियो । कारखाना उत्पादनमा राम्रो सुधार आए पनि खुद्रा, रेष्टुराँ र अन्य सेवा उद्योगहरु अझै पनि संघर्षरत छन् ।

प्रक्षेपणहरुले यस वर्षको अन्त्यतिर चिनियाँ अर्थतन्त्र गिरावट आउने अनुमान गरेका छन् किनभने त्यसबखत विश्व बजारमा मास्क, सर्जिकल ग्लोब र अन्य चिकित्सा उपकरणको मागमा कमी आउने थाल्नेछ । रासस/ एपी