इसेवा र नेपाल एसबिआई बैंकबीच सहकार्य, अब ५१ बैंकमा डिजिटल कारोबार गर्न सकिने

बैंकिङ

गृहपृष्ठ
बैंकिङ

इसेवा र नेपाल एसबिआई बैंकबीच सहकार्य, अब ५१ बैंकमा डिजिटल कारोबार गर्न सकिने

क्यापिटल नेपालआइतबार, चैत ३१, २०८१

काठमाडौं। नेपालको पहिलो तथा अग्रणी डिजिटल भुक्तानी सेवा प्रदायक कम्पनी इसेवा र नेपाल एसबिआई बैंकबीच विद्युतीय कारोबार सम्बन्धि समझदारी भएको छ। उक्त साझेदारीपछि अब इसेवा प्रयोगकर्ता र नेपाल एसबिआइ बैंकका ग्राहकले सहजै विद्युतीय माध्यमबाट रकम ट्रान्सफर गर्न सक्ने भएका हुन्।

दुवै संस्थाका ग्राहकलाई थप सेवा र पहुँच प्रदान गर्ने उद्देश्यका साथ गएको हप्ता एउटा औपचारिक कार्यक्रमका बिच दुवै संस्थाका प्रतिनिधिहरुले सम्झौता पत्रमा हस्ताक्षर गरी सो सेवा सुरु गरेका हुन्।

उक्त साझेदारीपछि एसबिआइ बैंकका ग्राहकले आफ्नो मोबाइल बैंकिङ्ग एप प्रयोग गरी सिधै इसेवा वालेटमा रकम लोड गर्न सक्नेछन् भने इसेवा प्रयोगकर्ताहरूले आफ्नो इसेवा वालेटमा भएको रकम बैंकको खातामा ट्रान्सफर गर्न सक्नेछन्। अब इसेवामाआवद्ध बैंक तथा वित्तीय संस्थाको संख्या ५१ पुगेको छ। एसबिआइ बैंक पनि इसेवामाआबद्ध भएपछि नेपालको डिजिटल वित्तीय सेवामा थप टेवा पुग्ने अपेक्षा गरिएको कम्पनीले बताएको छ।

इसेवाका प्रमुख कार्यकारी अधिकृत जगदीश खड्काले इसेवा र एसबिआई बैंकबीच भएको उक्त सम्झौताप्रति खुशी व्यक्त गर्दै दुवै संस्थाबीच हुने रकम ट्रान्सफरको अनुभवलाई सहजता र सरलता प्रदान गर्ने विषयमा जोड दिएका छन्। सम्झौताले ग्राहकहरूको अमूल्य समय बचाउने र डिजिटल कारोबारलाई थप सुरक्षित र प्रभावकारी बनाउने उनको भनाइ छ। खड्काले आउने दिनहरुमा ग्राहकको हित र सहजताका लागि आवश्यकता अनुसार थप सहकार्य गर्दै अघि बढ्ने प्रतिबद्धता समेत जनाएका छन्।

प्रकाशित मिति: आइतबार, चैत ३१, २०८१ १०:५५

प्रतिक्रिया दिनुहोस्