तनहुँ। जिल्लाको शुक्लागण्डकी नगरपालिका ९ घाँरीस्थित गौ संरक्षण केन्द्रका सामाजिक सञ्जालबाट दुई लाख संकलन भएको छ। केन्द्रका लागि शुक्लागण्डकी ६ खैरेनीटार निवासी युवा व्यवसायी राजेश पाण्डेले सामाजिक सञ्जालमार्फत एक सय अभियान सञ्चालन गरी दुई लाखभन्दा बढी रकम संकलन गरेका हुन्।
गौ संरक्षण केन्द्रमा रहेका गाईहरूको व्यवस्थापनका लागि पाण्डेले एक महिनासम्म सञ्चालित उक्त अभियानबाट दुई लाख २१ हजार ९१६ संकलन भएको जानकारी दिए। उनका अनुसार यस अभियानमा चार सय १६ जनाले सहयोग गरे।
सामाजिक सञ्जालबाट सुरु भएको अभियानमा प्रतिव्यक्ति न्यूनतम एक सय संकलन गर्ने लक्ष्य राखिए पनि कतिपयले स्वतःस्फूर्त रूपमा बढी रकम प्रदान गरेको पाण्डेले बताए। उनका अनुसार अनुसार बढीमा १६ हजार सहयोग दिने दाता पनि छन्।
छाडा रूपमा छाडिएका पशुचौपाया व्यवस्थापनका लागि केन्द्र स्थापना गरिएको भन्दै यसको सञ्चालनका लागि केही सहयोग पुगोस् भनेर यो अभियान सुरु गरेको उनको भनाइ छ।
छाडा छोडिएका पशुचौपायाका कारण राजमार्गमा सवारी दुर्घटना हुने, यातयात जाम हुने, बालबालिका, महिला तथा ज्येष्ठ नागरिक त्रसित हुने, चौपायाको मलमूत्रले बजार क्षेत्र दुर्गन्धित हुन थालेपछि नगरपालिकाले संरक्षण केन्द्र स्थापना गरेको थियो।
हाल गौ संरक्षण केन्द्रको व्यवस्थापन मुक्तिनाथ च्वयनधामले गरिरहेको छ। च्वयनधामका अध्यक्ष होमनाथ लम्सालले केन्द्रका लागि विभिन्न व्यक्ति तथा सङ्घसंस्थाले विविध अवसर पारी सहयोग गर्दै आउनुभएको जानकारी दिए।
