काठमाडौं। प्रधानमन्त्री केपी शर्मा ओलीले थाइल्यान्ड भ्रमणका क्रममा भारतीय समकक्षी नरेन्द्र मोदीसँगको भेट फलदायी रहेको बताए पनि सगरमाथा संवादका लागि दिएको निम्तो नस्वीकारेको देखिएको छ।
आज थाइल्यान्ड भ्रमण सकाएर स्वदेश फर्किएका प्रधानमन्त्री ओलीले त्रिभुवन अन्तर्राष्ट्रिय विमानस्थल आयोजित पत्रकार सम्मेलनमा भारतीय समकक्षी मोदीसँगको भेटवार्ता सुमधुर वातावरणमा मित्रता र हार्दिकताका साथ भएको दाबी गरेका हुन्।
प्रधानमन्त्री ओलीले गत सेप्टेम्बरमा आफूहरुबीच राम्रै टेलिफोन कुराकानी भएको र बाहिर हल्ला गरेजस्तो कुनै समस्या नरहेको दाबी गरे। उनले भने, ‘नराम्रो केलाई भन्ने? हामीले कुराकानी गर्यौं, निकै फ्रेन्डली भएको थियो। ‘पारस्परिक लगानी, व्यापार, पञ्चेश्वर, दोधारा चाँदनीबाट सिँचाइलगायतका विषयमा छलफल भए। दुई पक्षीय पारस्परिक हितका विषयमा पनि कुराकानी भए। यसलाई नराम्रो भन्ने?’
मोदीसँगको वार्तामा दुई छिमेकीबीच कुनै पनि सानातिना समस्या देखिए एकआपसमा संवाद गरिहाल्ने र टुंग्याउने गहिरो समझदारी बनेको ओली दाबी छ। ‘थाइल्यान्ड भेटघाट फलदायी रह्यो। मोदीको कुराकानीबाट म र मेरो कुराकानीबाट मोदीजी खुसी भएको पाएँ’, ओलीले भने।
भारत भ्रमणबारे सोधिएको प्रधानमन्त्री ओलीले आफू व्यस्त हुँदा भारत जान नपाएको र जान चाहे कसैले काँडेतार नलगाएको दाबी गरे।
ओलीले भने, ‘कहिले के काम परेको हुन्छ, कहिले के कारणले मात्रै हो। भारत भ्रमण अवरुद्ध भयो भन्छन्। काँडेतार लगाएको छ र कसैले?’
सगरमाथा संवादमा प्रमुख अतिथिका रूपमा निम्त्याइएका भारतीय समकक्षी मोदी नेपाल आउन नभ्याउने जानकारी आफूले पाएको ओलीले बताए। ‘यसपटक सगरमाथा संवादमा मोदीजी आउन भ्याउनुहुन्न। उहाँको पहिला नै युरोप जाने कार्यक्रम तय भइसकेको रहेछ। मोदीजी नआए पनि भारतबाट उच्च स्तरकै उपस्थिति हुन्छ’, उनले भने।
प्रधानमन्त्री ओली थाइल्यान्डको औपचारिक भ्रमण र छैटौं बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) शिखर सम्मेलनमा भाग लिएर स्वदेश फर्किएका हुन्।
थाई समकक्षी पे थोङ थान सिनावातको मैत्रीपूर्ण निमन्त्रणामा २१ सदस्यीय प्रतिनिधिमण्डलको नेतृत्व गर्दै प्रधानमन्त्री ओली चैत १९ गते थाइल्यान्ड गएका थिए।
थाइल्यान्डमा रहँदा प्रधानमन्त्री ओलीले छिमेकी भारतका प्रधानन्त्री नरेन्द्र मोदीलगायत विभिन्न मुलुकका समकक्षीसँग आपसी हित र चासोका विविधि विषयमा छलफल र चैत २२ मा बिमस्टेक शिखर सम्मेलनलाई सम्बोधन गरेका थिए।
