काठमाडौं। काठमाडौं महानगरले बालाजु औद्योगिक क्षेत्र प्रवेश मूलद्वारसँगै १ लाख लिटर पानी भण्डारण क्षमताको जुद्ध वारुणयन्त्र शाखा कार्यालय भवन सञ्चालनमा ल्याएको छ।
उक्त भवनको भुइँतलामा ८० हजार लिटर र छतमा २० हजार लिटर गरी १ लाख लिटर पानी भण्डारण क्षमताको भवन चैतदेखि सञ्चालनमा रहेको कामपा विपद् व्यवस्थापन विभागका प्रमुख जगदीश अर्यालले जानकारी दिए।
प्रमुख अर्यालका अनुसार २०८० पुस १८ गते शिलान्यास भवन निर्माण अवधि २०८१ फागुनसम्म थियो। २०७९ मंसिर २६ गते २८औँ महानगर दिवस अवसर पारेर यस ठाउँबाट दमकल सेवा शुभारम्भ गरिएको थियो।
क्षेत्रगत विपद्मध्येको आगलागी काठमाडौंका लागि प्रमुख समस्या बनेको छ। सहरी विकास अनियन्त्रित हुँदा सहरका सबै ठाउँमा अग्नि नियन्त्रणका लागि दमकल लैजान सक्ने अवस्था नरहेको पनि कामपाको भनाइ छ। दमकल पुग्ने ठाउँका लागि तीन वटा दमकल खरिद गर्ने तयारी गरिएको पनि कामपाको भनाइ छ।
जुन ठाउँमा ठूला दमकल जान सक्दैनन् त्यस्ता ठाउँका लागि साना दमकल खरिद गर्ने योजनामा कामपा रहेको छ। पछिल्लो समय कामपाले स–साना गल्लीमा हुने आगोलागी नियन्त्रणका लागि फायर ड्राइराइजर जडानको काम तीव्र रुपमा अघि बढाइरहेको छ।
कामपामा आगलागी हुँदा दमकल जान नसक्ने साँघुरा सडक तथा गल्लीमा ‘ड्राइ राइजर’ जडान गर्न सुरू गरेको कामपाको भनाइ छ। महानगरको विपद् व्यवस्थापन विभागले यस कार्यलाई तीव्र रूपमा अगाडि बढाएको छ भने केन्द्रीय योजनामा नभएका ठाउँमा वडाले पनि वडाकै बजेटबाट यो प्रणाली जडान गरिरहेको छ।
अहिले कामपाको ६, ७, ९, १३, १७, १८, २१, २५ र २७ मा ‘ड्राइ राइजर’ जडान भइसकेको छ भने अन्य वडामा पनि आवश्यकताअनुसार उक्त प्रविधि जडानको काम भइरहेको नगर प्रहरी उपरीक्षक विष्णुप्रसाद जोशीले जानकारी दिए।
उनका अनुसार कामपाका कतिपय भित्री गल्ली दमकल र एम्बुलेन्स छिर्न नसक्ने किसिमका छन्। साँघुरा गल्लीमा आगलागी वा अन्य विपत्जन्य घटना हुँदा नियन्त्रण कठिन हुने हुँदा उक्त प्रविधि जडान गरिएको हो।
