काठमाडौं। औद्योगिक क्षेत्रमा लोडसेडिङ हटेसँगै निर्माणजन्य सामग्रीको मूल्य ओरालो लागेको छ। भारतबाट नियमित रुपमा विद्युत् आउनासाथ नेपाल विद्युत् प्राधिकरणले औद्योगिक क्षेत्रमा चैत १५ गतेदेखि पूर्णरुपमा लोडसेडिङ हटाएसँगै उद्योगीले निर्माणजन्य सामग्रीको मूल्य घटाएका हुन्।
स्टिलमा प्रतिकेजी ४ रुपैयाँ घट्यो
नेपाल स्टिल उत्पादक संघका अध्यक्ष शोभाकर(हरि) न्यौपानेले उद्योगमा लोडसेडिङ हटेसँगै मूल्य घटाइएको जानकारी दिए। ‘चैत १५ गतेदेखि उद्योगमा नियमित विद्युत् आएसँगै लोडसेडिङकै कारण बढेको मूल्य केही मात्रामा घटाएका छौं,’ अध्यक्ष न्यौपानेले भने, ‘पछिल्लो केही दिनदेखि बेलाबेला विद्युत् कटौती हुने समस्या सुरु भएको छ तर, पहिलाको भन्दा नियमित आएकाले मूल्य समायोजन गरेका छौं।’
स्टिल उद्योगले लोडसेडिङकै कारण ९ रुपैयाँ ३३ पैसा मूल्यवृद्धि भएको तथ्यांक यसअघि सार्वजनिक गरेका थिए। ‘दैनिक १२ देखि १४ घन्टासम्मको लोडसेडिङका कारण उद्योगको लागत बढेको थियो,’ अध्यक्ष न्यौपानेले भने, ‘अहिले पनि पूर्ण रुपमा विद्युत् समस्या समाधान नहुँदा लागत बढिरहेको हो। यसमा विषयमा प्राधिकरण नेतृत्वसँग कुरा गरिरहेका छौं।’
प्राधिकरणले पूर्ण रुपमा बिजुली दिएपछि थप ५ रुपैयाँ ३३ पैसा पनि घटाउने तयारीमा उद्योग लागेको जनाइएको छ। यद्यपि, अहिले केही उद्योगले १० रुपैयाभन्दा बढी पनि मूल्य घटाइसकेका छन्। चैत मसान्त नजिकिन लागेको र बजारमा माग पनि कम हुन थालेपछि मूल्य घटाएर बिक्री वितरण सुरु गरिएको स्टिल उद्योगीको भनाइ छ।
विस्तारै बिजुली नियमित भए पनि कच्चापदार्थ र डलर सटही मूल्य भने नघटेका कारण बजारमा भनेजस्तै मूल्य समायोजन गर्न नसकेको उद्योगीहरुको तर्क छ। अहिले स्टिलको बजार मूल्य प्रतिकेजी ८४÷८५ रुपैयाँ छ। यसमा उद्योग हेरेर केही मूल्य तलमाथि रहेको छ।
सिमेन्टमा बोरामै घट्यो २५ रुपैयाँ
नेपाल सिमेन्ट उत्पादक संघले पनि लोडसेडिङ हटेसँगै बोरामा २५ रुपैयाँसम्म मूल्य घटाइएको जनाएको छ। दैनिक १२ देखि १४ घन्टासम्म अघोषित रुपमा सुरु भएको लोडसेडिङका कारण उद्योगको खर्च बढिरहेका बेला प्राधिकरणले पछिल्लो समय बिजुली नियमित गरेपछि मूल्य घटाएको एक उद्योगीले जानकारी दिए।
‘अहिले बजारमा २५ रुपैयाँसम्म सिमेन्टको मूल्य घटाएर पठाएका छौं,’ ती उद्योगीले भने, ‘नियमित रुपमा बिजुली आउँदा उद्योगको अतिरिक्त खर्च बचेकै कारण मूल्य घटाएका हौं। विस्तारै अझ घट्दै जान्छ।’
लामो समयदेखि उद्योगमा लोडसेडिङ भएकै कारण सिमेन्ट र स्टिलको मूल्य बढेको थियो। निर्माणको सिजनकै बेला निर्माणजन्य वस्तुको मूल्य बढाएको भन्दै उद्योगी र सरकारको चौतर्फी विरोध भएको थियो।
तर, उद्योग र सरकारले कच्चापदार्थ र विजुली नियमित नभएकै कारण खर्च बढेको र मूल्य समायोजन गर्दा बढेको दाबी गरिरहेका थिए। अहिले प्राधिकरणले नियमित बिजुली दिन थालेसँगै स्टिल र सिमेन्टले तत्कालै मूल्य घटाइएको उद्योगीहरु बताउँछन्।
