काठमाडौं। वैदेशिक रोजगारीबाट फर्किएकी दैलेखकी देवकी मगर बिहीबार एयर इन्डियामार्फत युएई–दिल्ली हुँदै नेपाल आइन्। एक महिने बिदामा नेपाल आएकी उनले युएई–नेपाल सिधा उडानमार्फत आउँदा महँगो भाडा तिर्नु पर्ने भएपछि दिल्ली ट्रान्जिट बनाएर आएकी हुन्।
मगर सिधा उडानमार्फत स्वदेश आउँदा २ हजार २ सय दिराम भाडा तिर्नुपर्ने भएपछि एयर इन्डियामार्फत दिल्ली हुँदै नेपाल १ हजार ५ सयमै आइपुगिन्।
‘सिधा उडानमार्फत नेपाल आउन खोज्दा छोइनसक्नु भाडा भनेपछि वैकल्पिक र सस्तो दरमा नेपाल आइपुगे’ उनले भनिन्, ‘दिल्ली हुँदै नेपाल आउँदा ७ सय दिराम बचत भयो।’
एक दिराम बराबर ३७ रुपैयाँ १६ पैसा नेपाली हुन्छ। युएई–नेपाल सिधा आउँदा मगरले ८१ हजार ७ सय ५२ रुपैयाँ तिर्नुपर्ने भयो। तर, त्यही दिन एयर इन्डियामार्फत नेपाल आउँदा जम्मा ५५ हजार ७ सय ४० रुपैयाँमै आइपुगिन्।
दिल्ली रुट भएर नेपाल आउँदा आफूले २६ हजार १२ रुपैयाँ जोगाएको मगरले बताइन्। मगरमात्रै होइन्, दुबईबाट बिदामा आउनेहरुको प्रमुख रोजाई एयर इन्डिया हुन थालेको छ। बिहीबार मात्रै युएईबाट झण्डै एक सय जना श्रमिक बोकेर आएको थियो।
बिदामा आउने सबै श्रमिकले दुईतर्फी भाडा उतैबाट तिरेर आएका हुन्। सिधा उडान गर्नेले महँगो भाडा लिएकाले एयर इन्डियाले त्यसको भरपुर फाइदा लिइरहेको छ। त्रिभूवन अन्तर्राष्ट्रिय विमानस्थलमा भेटिएका श्रमिकका अनुसार धेरै नेपालीहरुको प्रमुख रोजाई एयर इन्डिया परिरहेको छ। त्यसको प्रमुख कारण एयरफेयर नै हो।
सिधा उडान गर्नेले महँगो भाडा लिएकाले एयर इन्डियाले त्यसको भरपुर फाइदा लिइरहेको छ।
युएई–उडान ३ घण्टा ४० मिनेट हुन्छ। दिल्ली–नेपाल १ घण्टा ३० मिनेट हुन्छ। युएई–नेपाल सिधा उडान ४ घण्टा ३० मिनेट हुन्छ। युएई–दिल्ली–नेपाल उडान समय जोड्दा सिधा उडानसरह समय लाग्छ। तैपनि भाडा अत्यधिक भएकाले अधिकांश श्रमिकको पहिलो रोजाई एयर इन्डिया बनिरहेको छ।
नेपालका लागि सबैभन्दा बढी रोजगारी दिने मुलुकमा हाल संयुक्त अरब इमिरेट्स (यूएई) पर्छ। वैदेशिक रोजगार विभागको तथ्यांकअनुसार साउनमा ५९ हजार ५७५, भदौमा ५७ हजार ४९३, असोजमा ५३ हजार ५२५, कात्तिकमा ७० हजार ९९०, मंसिरमा ८४ हजार २२६, पुसमा ६७ हजार २५८ र माघमा ७२ हजार ४४१ जनाले श्रम स्वीकृति लिएका हुन्। यो संख्या प्रतिमहिना औसत करिब ६६ हजार हो।
श्रम स्वीकृति लिनेमध्ये पुरुष ४ लाख १२ हजार ५५२ र महिला ५२ हजार ९५६ छन्। माघमा मात्र ६४ हजार ३११ पुरुष र ८ हजार १३० महिलाले श्रम स्वीकृति लिएको तथ्यांकमा देखिन्छ।
तथ्यांकअनुसार यूएई श्रमिकको प्रमुख गन्तव्य रहेको छ, जहाँ एक लाख ४८ हजार १३३ जना गएका छन्। पछिल्लो समय यूएईमा सेवा क्षेत्रका लागि जाने नेपालीको संख्या बढेको छ। व्यक्तिगत पहुँचमा जान सहज भएपछि यूएई जानेले म्यानपावर कम्पनीमा मात्रै भर पर्नुपर्दैन।
अहिले नेपालीहरुले उताबाट आउँदा मात्रै होइन्, नेपालबाट जादा पनि एयर इन्डिया नै प्रयोग गरिरहेका छन्। यहाँबाट दिल्ली जाने र त्यहाँबाट दुबई यात्रा गर्नेको संख्या पनि धेरै देखिन्छ।
त्रिभूवन अन्तर्राष्ट्रिय विमानस्थलका प्रवक्ता रिञ्जी शेर्पाका अनुसार फ्लाइ दुबईले ४, हिमालयन एयरलाइन्सले १ र नेपाल एयरलाइन्सले १ दैनिक एउटा उडान गर्छ। त्यसैगरी नेपाल एयरलाइन्सले काठमाडौं–भैरहवा हुँदा दुबई हप्तामा दुई उडान गर्छ।
