नक्कली र गुणस्तरहीन सामानको आयात रोक्न समुद्रपार निकासी पैठारी संघको आग्रह

अर्थतन्त्र

गृहपृष्ठ
अर्थतन्त्र

नक्कली र गुणस्तरहीन सामानको आयात रोक्न समुद्रपार निकासी पैठारी संघको आग्रह

क्यापिटल नेपालबिहीबार, चैत २१, २०८१

काठमाडौं। नेपाल समुद्रपार निकासी पैठारी संघले सीमाक्षेत्रका भन्सार कार्यालय र राजस्व अनुसन्धान कार्यालयसँग सम्बन्धित व्यवसायीका चासो र गुनासाहरुको सम्बोधन गर्न सम्बन्धित कार्यालय प्रमुखहरुलाई आग्रह गरेको छ।

संघको एक प्रतिनिधिमण्डलले राजस्व अनुसन्धान कार्यालय पथलैया, सुक्खा बन्दरगाह सिर्सिया र वीरगन्ज भन्सार कार्यालयका प्रमुखहरुलाई भेटेर व्यवसायीले वस्तु आयातका क्रममा झेल्नुपरेका प्रक्रियागत कठिनाइ समाधानमा जोड दिएको हो। संघले नीतिगत सुधारका लागि समेत पहल गरिदिन उनहरुलाई आग्रह गरेको छ।

संघले राजस्व अनुसन्धान कार्यालय पथलैयाका प्रमुख हरिप्रसाद शर्मालाई आयातित वस्तुको मूल्यांकन सम्बन्धमा भन्सार कार्यालयहरुसँग समन्वय गर्न, ढुवानीकर्ता वा चालकहरुले गर्ने लापरवाहीमा व्यवसायीलाई दण्डित नगर्न र उजुरी परेको अवस्थामा गहिरो अनुसन्धान गरेर पक्राउ नगरी नहुने अवस्थामा मात्रै पक्राउ अनुरोध गरे।

उजुरी पर्नेबित्तिकै पक्राउ गर्दा निर्दोष हुँदा हुँदै पनि व्यवसायीको प्रतिष्ठा धमिलिने जोखिम रहने र यसबाट लगानीकर्ता निरुत्साहित हुने संघको भनाइ छ। राजस्व अनुसन्धान कार्यालयलाई ढुवानी साधनको खानतलासीमा मात्र केन्द्रिन नहुन पनि संघले सुझाव दिएको छ। प्रतिनिधिमण्डलका सहभागीले एउटै भिसिटिएसबाट पटकपटक वीरगन्जदेखि काठमाडौंसम्म सामान ढुवानी हुने गरेको सूचना प्राप्त भएको भन्दै यसलाई रोक्नपर्ने बताएका छन्।

ड्यामेज वा टुटफुट भई आएका सामान भन्सार महशुल छुट दिन र त्यस्तो क्षति प्रमाणित गर्ने व्यवस्था गर्न भन्सार कार्यालयहरुलाई अनुरोध गरेको संघको विज्ञप्तिमा उल्लेख छ। त्यसैगरी गलत सामान आएको अवस्थामा फिर्ता गर्ने अवधि ९० दिनबाट बढाएर १८० दिन कायम गर्न तथा नक्कली र गुणस्तरहीन सामानको आयात रोक्नुपर्नेमा संघले जोड दिएको छ।

प्रकाशित मिति: बिहीबार, चैत २१, २०८१ १६:४८

प्रतिक्रिया दिनुहोस्