काठमाडौं। भारतीय अटो बजारमा मारुती सुजुकीले अप्रिल ८ देखि ७ वटा मोडलमा मूल्य वृद्धि गर्ने भएको छ। कम्पनीले एक वर्षमा तेस्रो पटक मूल्य बढाउने घोषणा गरेको हो।
कम्पनीले कच्चा पदार्थ र सञ्चालन लागत बढेपछि ६२ हजार रुपैयाँ (भारु)ले कारको मूल्य बढाउने घोषणा गरेको छ। यसअघि फेब्रुअरी १ मा कम्पनीले गाडीको मूल्य ३२ हजार ५ सय (भारु) बढाएको थियो। कम्पनीले जनवरीमा पनि आफ्ना सबै मोडलको मूल्य ४ प्रतिशतसम्म बढाएको थियो। त्यतिबेला पनि मारुतीले मूल्य बढाउनुको कारण कच्चा पदार्थको मूल्य भएको बताएको थियो।
मारुती सुजुकीले मार्चमा १ लाख ९२ हजार ९८४ युनिट गाडी बिक्री गरेको छ। अघिल्लो वर्षको सोही महिनामा कुल १ लाख ८७ हजार १९६ गाडी बिक्री गरेको थियो। मारुतीको कुल बिक्री वार्षिक ३ प्रतिशतले बढेको छ। कम्पनीका अनुसार गत महिना १ लाख ५० हजार ७४३ प्यासेन्जर भेहिकल (पीभी) बिक्री गरेको थियो। सन् २०२४ को मार्चमा कम्पनीको आन्तरिक पीभी बिक्री १ लाख ५२ हजार ७१८ युनिट थियो।
मारुती सुजुकीको साना कारहरुको बिक्री घटेको छ। अल्टो र एस-प्रेसो जस्ता साना कारहरूको बिक्री गत महिना ११ हजार ६५५ युनिट भएको थियो। जुन २०२४ को मार्चमा ११ हजार ८२९ युनिट थियो। त्यस्तै, बलेनो, डिजायर, इग्निस र स्विफ्ट जस्ता ‘कम्प्याक्ट’ कारको बिक्री मार्चमा ६६ हजार ९०६ युनिटमा झरेको छ, जुन अघिल्लो वर्षको सोही महिनामा भने ६९ हजार ८४४ युनिट थियो।
ग्राण्ड भिटारा, ब्रेजा, एर्टिगा र एक्सएल६ जस्ता युटिलिटी गाडीको बिक्री अघिल्लो महिनाको ५८ हजार ४३६ युनिटबाट बढेर ६१ हजार ०९७ युनिट पुगेको छ। भ्यान इकोको बिक्री गत महिना १० हजार ४०९ युनिट थियो। जुन गत वर्षको मार्चमा १२ हजार ०१९ युनिट थियो। सोही अवधिमा हलुका व्यावसायिक गाडी सुपर क्यारीको बिक्री घटेर २ हजार ३ सय ९१ युनिटमा पुगेको छ, जुन अघिल्लो वर्षको मार्चमा ३ हजार ६१२ युनिट थियो।
