काठमाडौं। विरलै देखिने दृष्य बुधबार काठमाडौंको कोटेश्वरमा देखियो। सामान्य अर्थमा भन्ने हो भने, मालिकले आफ्नो गार्डलाई दुबोको माला लगाएर सम्मान गरे। आफ्नो काममा थप जिम्मेवारी बन्न हौसला दिए।
यी दृष्यमा देखिएका दुई व्यक्ति हुन्, मीनबहादुर गुरुङ (मालिक) र सुरक्षागार्ड कृष्णप्रसाद (दुल) पराजुली। मीनबहादुर भाटभटेनी सुपरमार्केटका सञ्चालक हुन्। झण्डै चार दशकदेखि सञ्चालन हुँदै आएको भाटभटेनीले देशभर आफ्नो शाखा विस्तार गरेको छ। यसमध्ये भाटभटेनीको कोटेश्वर शाखाको प्राङ्गणमा आज मीनबहादुरले दुललाई सम्मान गरेका हुन्।
सामान्यतया सुरक्षागार्डलाई आफ्ना मालिकदेखि आफू कार्यरत संस्थाका कर्मचारीलाई सम्मान व्यक्त गरी संस्थाको सुरक्षा गर्ने जिम्मेवारी हुन्छ। सुरक्षागार्डले आफ्नो जिम्मेवारी पूरा गर्नु कुनै नौलो कुरा होइन्। तर, दुलले साहस देखाए। हिक्मत जुटाए। आफू जोडिएको संस्थाको भ्याएसम्म रक्षा गरे।
दुलले देखाएको साहसलाई मीनबहादुरले कदर गरे। सम्मान दिए। आफ्नो काममा जिम्मेवार हुन हौसला दिँदै पुरस्कृत गरे।
...
गत चैत्र १५ गते राजावादीहरुले काठमाडौंको तीनकुनेमा आन्दोलन गरेका थिए। प्रहरीसँग झडप भएपछि आन्दोलनकारी कोटेश्वरमा रहेको भाटभटेनीसम्म पुगे। घरहरुमा ढुंगा हान्दै हिँडेका आन्दोलनकारीले घर र गाडीमा आगो लगाइदिएका थिए।
यही क्रममा उनीहरुले भाटभटेनीमा ढुंगा हाने। सुपरमार्केटको सिसा फुटाए। अन्ततः आन्दोलनकारीले सामान उठाउन थाले। बलिया आन्दोलनकारीले ठूला र महंगा सामान उठाए। कसैले बेयर बोकेर हिँडे। कसैले कपडा र पाउरोटी लगे। कोही स्याउ सुन्ताल खाँदै गए।
सुरुमा आन्दोलनकारीले आक्रमण गर्दा सुरक्षागार्ड र कर्मचारी एकापट्टी बसेर हेरिरहे। अति भएपछि सुरक्षागार्डले हिक्मत जुटाए। केही सुरक्षागार्डले भित्र बसेर आन्दोलनकारीलाई लखेटे। दुल बाहिर बसेर ज्यानको प्रर्वाह नगरी अनियन्त्रित रुपमा भिडलाई लखेटे। उनीहरूले भाटभटेनीमा थप क्षति हुनबाट बचाए।
आज उनै दुलसहित अरु कर्मचारीलाई सम्मान गर्न राखिएको कार्यक्रममा उनले भने, ‘त्यो दिन आतंककारी आए। ढुंगामुढा गर्न थाले। ज्यान त जोगाउनु पर्यो भनेर साइड लागेर बस्यौँ। हामी साइडमा बस्दाखेरी उनीहरु सबै पसेर लुट्न थाले। फलफूल, बियरका बोतल, वाइन, फ्रिज सबै लिएर गए। लौ भएन भनेर हामीले मिलेर यता आयौँ। अरु भित्रबाट लखेट्ने। म चाहिँ बाहिर बसेर ड्याङ–ड्याङ हान्ने। बाहिर म एक्दै भए पनि डर लागेन।’
जब भाटभटेनीमा आन्दोलनकारीले गरेको गतिविधि क्यामेराहरुमा कैद भयो। तब, उनी एकाएक चर्चित पात्र बने। सर्वत्र बहादुरीको प्रशंसा भयो। ज्यानको जोखिम मोलेर थप क्षति हुन जोगाएको भन्दै भाटभटेनी ग्रुपले दुलसहित कर्मचारीलाई भव्य कार्यक्रम राखेर सम्मान गरी बढुवा गरेको हो।
भावुक बने भक्कानिएनन
सम्मान गर्न उद्घोषक सदीक्षा श्रेष्ठले सम्मानका लागि दुललाई मञ्चमा बोलाए। यसबेला मीनबहादुरको दम्पती भावुक देखिए। दुल आफ्नो शरीर तनक्काउँदै सलाम गरेर मञ्चमा पुगे। यो बेला माहोल भावुक बन्यो।
मञ्चमा जानुअघि दुल असहज महसुस गर्दै थिए। उनलाई लागेको थियो होला, जीवनकै ठूलो सम्मान पाइरहेको छु, २२ वर्ष योगदान गरेको संस्थामाथि थप जिम्मेवारी पाइरहेको छु। दर्शकहरुले ताली बजाएर दुललाई सम्मान गरिरहँदा अनुहारमा निकै चमक देखिन्थ्यो। तर, उनले असहज अनुभूति गरिरहेको आंकलन गर्न सकिन्थ्यो।
यता, मीनबहादुर पनि भावुक देखिए। उनले दुललाई दुबोको माला लगाइदिए। रुमालले आँसु पुछे। त्यसपछि भाटभटेनीको तर्फबाट एकसाथ पाँच तह बढुवा गर्दै पाँच लाख एक हजार १११ रुपैयाँको चेक थमाए। उनीसँगै अन्य कर्मचारी पनि सम्मानित भए। बढुवाको तक्मा लगाए।
मनोबल बढाउन खप्पिस मिनबहादुर
आफ्नो कर्मचारीहरुलाई खुसी बनाउन सके, व्यावसायिक फसलता पाउन कठिन नहुन सक्छ। यसको उदाहरणहरु धेरै छन्। तीनैमध्येको एक हुन्, मीनबहादुर।
ज्यान जोखिममा राखेर काम गर्ने कर्मतारीलाई सम्मान गर्न राखेको आजको कार्यक्रमले मीनबहादुरको सफलता झल्काउँछ। यसले देखाउँछ कि उनी कर्मचारीप्रति कति उदार र इमान्दार छन्।
आफ्नो जिम्मेवारी पूरा गरेका कर्मचारीलाईको काम सामान्य रुपमा लिए पनि हुने थियो। तर, मीनबहादुरले सबैलाई हौसला दिने गरी कार्यक्रम राखे।
भाटभटेनीमा दुई दशक
काठमाडौंको नक्सालमा रहेको भाटभटेनीमा निर्माणको काम गर्न आएका दुल पछि सुरक्षागार्ड बने। उनले त्यही संस्थामा दुई दशकभन्दा बढी अर्थात २२ वर्ष बिताए।
उनले भाटभटेनीमा बिताएको यो अवधिबाट घडेर जोडे। घर बनाए। छोराछोरी हुर्काए। पढाए। बिहेवारी गरिदिए। गाडी किने। उनी भन्छन्, ‘मैले जागिर खाएको २०५८ सालदेखि हो। यही जागिर खाएर जग्गा किनेँ। घर बनाए। त्यसपछि छोरा पढाएँ। छोराको बिहे गरेँ। गाडी किनेँ।’
अहिले उनी भाटभटेनीको सुरक्षा गर्न एकसाथ पाँच तह बढुवा भएका छन्। जिम्मेवारी थपिएको छ। आफूले जिम्मेवारी पूरा गर्दा मालिकले सम्मान गरी हौसला थपिदिएका छन्। जिम्मेवारी निभाउँदा पाउने खुसी र सम्मानले सबैलाई राम्रो हुने सन्देश दिएका छन्, दुलले।
