काठमाडौं। बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक)को छैटौं शिखर सम्मेलनमा सहभागी हुन मंगलबार थाइल्यान्ड पुगेका प्रधानमन्त्री केपी शर्मा ओलीले न्यानो आतिथ्य पाएका छन्।
थाइल्यान्डमा पहिलो पटक प्रधानमन्त्री स्तरीय भ्रमण भएको हुँदा ओलीलाई थाई समकक्षी फेथोङथान सिनावातबाट विशेष महत्त्व दिइएको परराष्ट्र मन्त्रालयले जनाएको छ।
पाँचदिने भ्रमणको दोस्रो दिन आज प्रधानमन्त्री ओलीले थाई समकक्षीसँग द्विपक्षीय भेटवार्ता गरेका छन्। भेटवार्तापछि नेपाल र थाइल्यान्डबीच ८ वटा समझदारीपत्रमा हस्ताक्षर भएको छ। प्रधानमन्त्री ओली र थाई समकक्षीको उपस्थितिमा दुई देशका सरकारी पक्षबीच दुई वटा र गैरसरकारी पक्षबीच ६ वटा समझदारीपत्रमा हस्ताक्षर भएको परराष्ट्रले बताएको हो।
द्विपक्षीय भेटवार्तामा राजनीतिक तथा द्विपक्षीय सम्बन्ध, व्यापार तथा आर्थिक सहकार्य, उड्डयन, पर्यटन तथा संस्कृति, विकास सहकार्य, तथा क्षेत्रीय र बहुपक्षीय मुद्दाका सम्बन्धमा छलफल भएको छ।
समझदारीपत्रमा नेपालका तर्फबाट परराष्ट्रमन्त्री डा आरजु राणा देउवा र थाइल्यान्डका संस्कृतिमन्त्री सुडवान वाङसुफाकिज्कोसोलले सांस्कृतिक क्षेत्रमा सहकार्यसम्बन्धी समझदारीपत्रमा हस्ताक्षर गरेका छन्।
त्यस्तै परराष्ट्रमन्त्री देउवा र थाइल्यान्डका पर्यटन तथा खेलकुदमन्त्री सोरावाङ तियनथोङले पर्यटन क्षेत्रमा सहकार्यसम्बन्धी समझदारीपत्रमा हस्ताक्षर गरेको परराष्ट्र मन्त्रालयले जनाएको छ। दुवै देशका प्रधानमन्त्रीको उपस्थितिमा नेपाल र थाइल्यान्डका गैरसरकारी क्षेत्रबीच विभिन्न ६ वटा समझदारीपत्रमा हस्ताक्षर भएका छन्।
नेपाल नेत्र ज्योति संघ र थाइल्यान्डको महिदोल विश्वविद्यालयअन्तर्गतको रामाथिवोदी अस्पतालबीच सहकार्यसम्बन्धी समझदारीपत्रमा हस्ताक्षर भएको छ। उक्त समझदारीपत्रमा नेपाल नेत्रज्योति संघका अध्यक्ष प्राडा चेतराज पन्त र महिडोल युनिभर्सिटीका चिकित्सा संकाय, रामाथिबोडी अस्पतालका डिन प्राध्यापक आर्टिट उंकानन्तले हस्ताक्षर गरेका छन्।
यस्तै, काठमाडौं विश्वविद्यालय र थाइल्याण्डको सियाम विश्वविद्यालय सहकार्यसम्बन्धी पत्रमा पनि हस्ताक्षर भएको छ।
