काठमाडौं। नयाँ शैक्षिक सत्र सुरु हुनै लागेका बेला सरकारसँग राखिएका विभिन्न माग पूरा नभएको भन्दै देशभरका शिक्षकले आजदेखि काठमाडौं केन्द्रित सडक आन्दोलन गर्दै छन्।
नेपाल शिक्षक महासंघले आजदेखि काठमाडौं जाऔं अभियानअन्तर्गत आजदेखि अनिश्चितकालीन सडक आन्दोलन गर्न लागेको हो। सरकारले शिक्षकका माग सम्बोधन नगरेको भन्दै माघ २० देखि महासंघ आन्दोलनमा छ।
आन्दोलनबारे जानकारी दिन मंगलबार आयोजित पत्रकार सम्मेलनमा अध्यक्ष लक्ष्मीकिशोर सुवेदीले संसदमा छलफलमा रहेको विद्यालय शिक्षा विधेयक यथाशीघ्र जारी गर्नुपर्नेलगायत मागसहित आन्दोलन थालिएको बताए। तर, संसदको हिउँदे अधिवेशन मंगलबारदेखि समापन भएकाले महासंघले राखेको शिक्षा विधेयक जारी गर्नुपर्ने माग पूरा नहुने भएको छ।
अब बर्खे अर्थात् बजेट अधिवेशनमा मात्रै शिक्षासम्बन्धी विधेयक सरकारले सदनमा टेबुल गर्न सक्नेछ।
महासंघमा आबद्ध गुरुहरु विरोधस्वरुप आज दिउँसो विभिन्न स्थानबाट र्यालीसहित माइतीघरमण्डलामा भेला हुनेछन् भने अपराह्न ४ बजेसम्म माइतीघरको जुलुस बानेश्वर पुग्नेछ।
महासंघले बिहीबारदेखि हरेक दिन बिहान ११ बजेदेखि ४ बजेसम्म माइतीघर–बानेश्वर सडक खण्डमा भेला भएर विरोध प्रदर्शन गर्ने अध्यक्ष सुवेदीले बताए।
गुणस्तरीय विद्यालय शिक्षा, विद्यार्थी र शिक्षक कर्मचारीमैत्री विद्यालय शिक्षा ऐन जारी गराउन सरकारलाई दबाब दिने उद्देश्यले सडक आन्दोलन थालिएको उनको दाबी छ। आन्दोलनमा देशभरका सबै शिक्षक, कर्मचारी सहभागी हुने उनले बताए।
-1743570672.jpg)
