१५ अर्ब लगानीमा त्रिभुवन अन्तर्राष्ट्रिय विमानस्थलको काम हुँदै, उडान समय बढ्यो

पूर्वाधार

गृहपृष्ठ
पूर्वाधार

१५ अर्ब लगानीमा त्रिभुवन अन्तर्राष्ट्रिय विमानस्थलको काम हुँदै, उडान समय बढ्यो

क्यापिटल नेपालमंगलबार, चैत १९, २०८१

काठमाडौं। त्रिभुवन अन्तर्राष्ट्रिय विमानस्थल आजदेखि दैनिक १८ घण्टा सञ्चालनमा आएको छ। विमानस्थलको अभिवृद्धिका लागि गत कात्तिक २३ देखि यही चैत १८ गतेसम्म पाँच महिना दैनिक १० घण्टा विमानस्थल बन्द गरेर विमानस्थलको क्षमता अभिवृद्धिअन्तर्गत भौतिक संरचना निर्माणको काम गरिएको थियो।

आजदेखि विमानस्थल बिहान ६ बजेदेखि राति १२ बजेसम्म खुला रहने विमानस्थलका महाप्रबन्धक जगन्नाथ निरौलाले जानकारी दिए। उनका अनुसार विमानस्थलका ट्याक्सी वेलाई धावनमार्गसँग जोड्ने लिंक वेको निर्माण सम्पन्न भएको छ। समानान्तर ट्याक्सी वे निर्माणको काम भने जारी रहेको छ।

नेपाल नागरिक उड्डयन प्राधिकरणअन्तर्गतको हवाई यातायात क्षमता अभिवृद्धि आयोजनाले विमानस्थलको दक्षिण-पश्चिमतर्फ समानान्तर ‘ट्याक्सी वे’, उत्तरतर्फको ‘इन्टरनेसनल एप्रोन’ र विमानस्थलको पूर्वतर्फको ‘ह्याङ्गर एप्रोन’लगायत विस्तारको काम गरिरहेको हो।

यी काम पूरा गर्न करिब १५ अर्ब खर्च हुने आयोजनाले जनाएको छ। हालसम्म ९० प्रतिशत काम सम्पन्न भएको आयोजना प्रमुख दीपेन्द्र श्रेष्ठले जानकारी दिए। रातिको समयमा गर्नुपर्ने विमानस्थलको भौतिक संरचनाको काम करिब सकिए पनि आयोजनाको सम्पूर्ण काम सक्न करिब डेढ वर्ष लाग्ने आयोजनाले जनाएको छ।

प्रकाशित मिति: मंगलबार, चैत १९, २०८१ १४:३२

प्रतिक्रिया दिनुहोस्