लुटपाट, आगजनी, धनजन क्षति र व्यक्तिगत सम्पत्तिमाथिको आक्रमण निन्दनीयः महासंघ

उद्योग

गृहपृष्ठ
उद्योग

लुटपाट, आगजनी, धनजन क्षति र व्यक्तिगत सम्पत्तिमाथिको आक्रमण निन्दनीयः महासंघ

क्यापिटल नेपालशनिबार, चैत १६, २०८१

काठमाडौं। नेपाल उद्योग वाणिज्य महासंघले विभिन्न माग राखी हुने गरेका आन्दोलन/प्रदर्शनबाट सर्वसाधारण एवं उद्यमी व्यवसायीको पेसा व्यवसाय गर्न पाउने नैसर्गिक अधिकार हनन भएको जनाएको छ।

निजी तथा सार्वजनिक सम्पत्तिमाथि हुने गरेको आक्रमण, लुटपाट, आगजनीलगायत गतिविधिप्रति ध्यानाकर्षण भएको बताउँदै महासंघले विज्ञप्तिमार्फत धारणा सार्वजनिक गरेको हो।

‘चैत १५ मा काठमाडौंमा भएको आन्दोलन/प्रदर्शनका क्रममा मानवीय क्षतिसँगै धनजनमा भएको आक्रमण निकै दुःखद छ। आन्दोलन/प्रदर्शनका क्रममा ज्यान गुमाएकाप्रति श्रद्धाञ्जली अर्पणसहित परिवारजनमा समवेदना व्यक्त गर्दै घाइते सबैको स्वास्थ्यलाभको कामना गर्दछौं’, महासंघको विज्ञप्तिमा भनिएको छ, ‘सर्वसाधारणको निजी जायजेथा, मिडिया हाउस, व्यावसायिक प्रतिष्ठानको सम्पत्ति, कार्यालय र अन्य व्यापारिक गतिविधिमा आक्रमण, आगजनी, लुटपाटलगायतका हिंस्रक घटनाबाट ठूलो क्षति पुगेकामा भत्र्सना गर्दै क्षतिपूर्ति दिइनुपर्छ।’

संविधान प्रदत्त अधिकारभित्र रहेर आफ्ना माग राख्न पाइए पनि हिंस्रक आन्दोलन एवं प्रदर्शनका साथै लुटपाट, आगजनी, धनजनको क्षति र व्यक्तिगत सम्पत्तिमाथिको आक्रमण निन्दनीय भएको महासंघको ठहर छ। कुनै पनि स्वरुपमा हुने यस प्रकारका घटनाप्रति सधैं निन्दा एवं भर्त्सना गर्नुका साथै सार्वजनिक सुरक्षा सुनिश्चित गर्न र यस्ता घटनाको पुनरावृत्ति रोक्न महासंघले सबैसँग आग्रह गरेको छ।

प्रकाशित मिति: शनिबार, चैत १६, २०८१ १२:०२

प्रतिक्रिया दिनुहोस्