एन्फाले वार्षिक बजेट डेढ अर्ब पेश गर्दै, अरू निर्णय के-के भए?

अर्थतन्त्र

गृहपृष्ठ
अर्थतन्त्र

एन्फाले वार्षिक बजेट डेढ अर्ब पेश गर्दै, अरू निर्णय के-के भए?

क्यापिटल नेपालबुधबार, चैत १३, २०८१

काठमाडौं। अखिल नेपाल फुटबल संघ (एन्फा)ले आगामी आर्थिक वर्षका लागि एक अर्ब ५६ करोड ३२ लाखको बजेट साधारणसाभामा पेस गर्ने निर्णय गरेको छ।

एन्फाको दुई दिन बसेको कार्यसमितिको बैठकले आगामी वैशाख २६ गते साधारणसभा गर्ने निर्णय गर्दै उक्त सभामा वार्षिक कार्यक्रम तथा प्रतियोगिताका लागि उक्त रकम पेस गर्ने निर्णय गरेको एन्फाद्वारा आज जारी प्रेस विज्ञप्तिमा जनाएको छ।

एन्फाले आर्थिक वर्ष २०८०/८१ को लेखापरीक्षण प्रतिवेदन पनि कार्यसमितिबाट पारित गरेर साधारणसभामा पेस गर्ने निर्णय गरेको छ। कार्यसमितिको बैठकले पियुष न्यौपानेलाई अन्तर्राष्ट्रिय सम्बन्ध प्रमुखमा नियुक्त गर्ने निर्णय गरेको छ। त्यस्तै, बैठकले म्याट रसलाई राष्ट्रिय पुरुष फुटबल टोलीको मुख्य प्रशिक्षकमा नियुक्त गर्ने निर्णय पनि गरेको छ।

एन्फाले पूर्वअध्यक्ष गणेश थापाले फिफाको निर्देशन उल्लंघन गरेकोलगायत अन्य गतिविधिमाथि आवश्यक अनुसन्धान तथा छानबिन गरी कारबाही गर्न फिफा, एएफसी, अख्तियार दुरुपयोग अनुसन्धान आयोग, नेपाल प्रहरी तथा संघको न्यायिक निकायमा आवश्यकताअनुसार पत्राचार गर्ने निर्णय गरेको छ।

एन्फाका वरिष्ठ उपाध्यक्ष वीरबहादुर खड्कालगायत अन्य व्यक्तिउपर गम्भीर प्रकृतिका उजुरीलाई सम्बन्धित निकायमा छानबिन गरी निर्णयका लागि पत्राचार गर्ने निर्णय गरेको छ।

प्रकाशित मिति: बुधबार, चैत १३, २०८१ १६:४९

प्रतिक्रिया दिनुहोस्