काठमाडौं। मकवानपुरस्थित कुलेखानी जलविद्युत् केन्द्रका तीन वटै युनिट पूर्ण क्षमतामा सञ्चालनमा आएका छन्। सुक्खायाम सुरु भएकाले कुलेखानी जलविद्युत् केन्द्रको प्रथम, दोस्रो र तेस्रोे युनिट पूर्ण क्षमतामा सञ्चालनमा आएका हुन्।
कुलेखानी जलविद्युत् प्रथमले ६० मेगावाट, दोस्रोले ३२ मेगावाट र तेस्रोले १४ मेगावाट विद्युत् उत्पादन गरिरहेको छ। ‘आवश्यकताका आधारमा अहिले दैनिक १४ देखि १८ घण्टा कुलेखानी जलविद्युत् केन्द्र पूर्ण क्षमतामा सञ्चालन भइरहेको छ’, कुलेखानी प्रथमका प्रमुख तारादत्त भट्टले भने, ‘चैत ३ देखि तीनवटै युनिट पूर्ण क्षमतामा सञ्चालन आएका छन्।’
आवश्यकतानुसार विद्युत् उत्पादन भइरहेको उनले बताए। रन अफ रिभरमा आधारित आयोजनाको सुक्खायाममा उत्पादन घटेकाले विद्युत् भार व्यवस्थापन गर्न कुलेखानी जलविद्युत् केन्द्रका तीनवटै युनिट पूर्ण क्षमतामा सञ्चालनमा आएका कुलेखानी जलविद्युत् केन्द्र प्रथमका सहायक इन्जिनियर रामकुमार बुढाथोकीले जानकारी दिए।
‘वर्षाको समय रनअफ रिभरमा आधारित आयोजना पूर्ण रूपमा सञ्चालनमा हुन्छ’, सहायक इन्जिनियर बुढाथोकीले भने, ‘त्यतिबेला हामी ड्याममा पानी सञ्चित गरेर राख्छौँ र सुक्खायाम सुरु भएसँगै रन अफ रिभरमा आधारित आयोजनाको विद्युत् उत्पादन घट्छ।’ सुक्खायाममा कुलेखानी जलविद्युतका युनिट सञ्चालनमा आउने उनले बताए।
‘विद्युत भार व्यवस्थापन केन्द्रको आवश्यकतानुसार हामीले पूर्ण क्षमतामा सञ्चालन गर्दै आएका छौं’, बुढाथोकीले भने, ‘अहिले दैनिक १४ देखि १८ घन्टासम्म विद्युत् उत्पादन गरिरहेका छौं। आवश्यक पर्यो भने हामी चौबीसै घन्टा विद्युत् उत्पादन गर्छौं।’
सहायक इन्जिनियर बुढाथोकीका अनुसार चालू आव २०८१/८२ को साउनदेखि फागुनसम्म कुलेखानी जलविद्युत् केन्द्र प्रथमले ८१ हजार दुई सय ९ मेगावाट विद्युत् उत्पादन गरेको छ। आव २०८०/८१ मा ३४ हजार तीन सय ८८ मेगावाट मात्र विद्युत् उत्पादन गरेको थियो।
-1743074584.jpg)
