स्वर्णलक्ष्मी सहकारी ठगी प्रकरणः जिल्ला अदालतको फैसलाविरुद्ध उच्च अदालत पुगे रवि

सहकारी

गृहपृष्ठ
सहकारी

स्वर्णलक्ष्मी सहकारी ठगी प्रकरणः जिल्ला अदालतको फैसलाविरुद्ध उच्च अदालत पुगे रवि

क्यापिटल नेपालशुक्रबार, चैत ८, २०८१

काठमाडौं। राष्ट्रिय स्वतन्त्र पार्टी (रास्वपा) का सभापति रवि लामिछानेले स्वर्णलक्ष्मी सहकारीको बचत हिनामिना मुद्दामा काठमाडौं जिल्ल्ला अदालतबाट भएको फैसलाविरुद्ध उच्च अदालत पाटनमा निवेदन दर्ता गराएका छन्।

लामिछानेलाई स्वर्णलक्ष्मी सहकारीको बचत अपचलन मुद्दामा माघ ३ गते काठमाडौं जिल्ला अदालतका न्यायाधीश माधवप्रसाद अधिकारीले ६० लाख धरौटी लिएर थुनामुक्त गर्ने आदेश दिएका थिए। जिल्ल्ला अदालतले फैसला सुनाएको ३४ दिनपछि लामिछाने पुनरावेदन माग्दै उच्च अदालत पुगेका हुन्।

लामिछाने उच्च अदालतमा पुनरावेदन निवेदन दर्ता गराउन जाने क्रममा अदालतबाहिर रास्वपा कार्यकर्ताको ठूलो समूह जम्मा भएको थियो। उनले आफू बोल्ने समय छिट्टै आउने र त्यसपछि बोलेपछि धेरैको बोली बन्द हुने चेतावनी दिए।

रविले कास्की र रुपन्देही जिल्ला अदालतको आदेशविरुद्ध यसअघि नै पुनरावेदन निवेदन दर्ता गराइसकेका छन्। पर्साको सानो पाइला सहकारीको बचत अपचलनबारे लामिछानेविरुद्ध अनुसन्धान गरिए पनि अहिलेसम्म मुद्दा दर्ता गरिएको छैन।

चितवनको सहारा सहकारीसम्बन्धी मुद्दामा त्यहाँको जिल्ला अदालतले माघ २४ गते ५४ लाख धरौटीमा थुनामुक्त गर्ने आदेशविरुद्ध मात्रै उच्च अदालतमा जाने रविको तयारी छ।

प्रकाशित मिति: शुक्रबार, चैत ८, २०८१ १४:४१

प्रतिक्रिया दिनुहोस्