इलाम। नेपाली चियाको अवलोकनका लागि चिनियाँ टोली नेपाल आएको छ। टी एलायन्स अफ नेपाल र इलाम नगरपालिकाको सहकार्यमा नेपालस्थित चिनियाँ दूतावासका आर्थिक सल्लाहकार र अन्य प्रतिनिधि इलाममा आएका हुन्।
टोलीले आइतबारदेखि यस क्षेत्रको चिया खेती, चिया उद्योगको अवस्था, हरियो पत्ती प्रशोधन विधि र किसानले अपनाएको चिया खेती प्रविधिका विषयमा अध्ययन तथा अवलोकन गरिरहेकाे टी एलायन्सका उपाध्यक्ष जीवन न्यौपानेले जानकारी दिए।
इलाम नगरप्रमुख केदार थापाले विशिष्ट पाहुनालाई स्वागत गर्दै नेपाल–चीन सम्बन्धमा चियाको योगदानबारे चर्चा गरे। नेपाल र चीनबीचको सम्बन्ध ऐतिहासिक, सांस्कृतिक तथा व्यापारिक आधारमा मजबुत रहेको बताउँदै उनले नेपालको चिया चीनबाट यहाँ ल्याएर विकास भएको स्मरण गरे।
उनले भने, ‘चिया हाम्रो साझा सम्पदा हो, जसले दुई देशका जनतालाई भावनात्मक रूपमा नजिक ल्याएको छ।’
नगरप्रमुख थापाले एक सय ५० वर्षअघि नेपालमा चीनबाट बिउ ल्याएर चियाखेती सुरुआत भएकोे उल्लेख गर्दै हाल यहाँको चियाले नेपालको अन्तर्राष्ट्रिय पहिचान बनाउन महत्त्वपूर्ण भूमिका खेलेको बताए।
चिनियाँ दूतावासका प्रतिनिधिहरूले नेपालसँगको सहकार्यलाई अझ सुदृढ गर्दै नेपालको चिया उद्योग विकासका लागि निरन्तर सहयोग गर्ने प्रतिबद्धता व्यक्त गरेका छन्।
नेपालस्थित चिनियाँ दूतावासका आर्थिक सल्लाहकार सिए युले विशेषगरी इलाम तथा कोसी प्रदेशमा उत्पादन हुने चिया प्रवर्द्धनमा चीनले चासो राखेको बताए।
सन् २०२४ डिसेम्बरमा चीन सरकारको वाणिज्य मन्त्रालय तथा झाङझोउ कलेज अफ साइन्स एण्ड टेक्नोलोजीको सहकार्यमा चिया व्यवसायीका लागि आयोजित तालिमको महत्त्वलाई पनि भ्रमणले उजागर गरेको उपाध्यक्ष न्यौपानेको भनाइ छ।
