काठमाडौं। मोबाइल डिभाइस म्यानेजमेन्ट सिस्टम ९एमडीएमएस० खरिद प्रकरणमा दायर भएको भ्रष्टाचार मुद्दामा ८ जना दोषी ठहर भएका छन्।
अख्तियार दुरुपयोग अनुसन्धान आयोगले दायर गरेको उक्त भ्रष्टाचार मुद्दामा विशेष अदालतले बिहीबार फैसला सुनाएको हो।
विशेष अदालतका अध्यक्ष न्यायाधीश टेकनारायण कुँवर, सदस्य न्यायाधीशद्वय रितेन्द्र थापा र विदुर कोइरालाको इजलासले नेपाल दूरसञ्चार प्राधिकरणका पूर्व अध्यक्ष दिगम्बर झा र पुरुषोतम खनालसहित ८ जनालाई दोषी ठहर गरेको हो।
त्यसैगरी विदेशी कम्पनी मलेसियाको न्युमेरा, नमस्ते ग्लोबल सिङ्गापुर, ओएसी डिजिटल इन्डियालाई पनि अदालतले दोषी ठहर गरेको छ।
यस्तै न्युमेरा कम्पनी मलेसियाका अध्यक्ष मोहम्मद नुर अमिन बिन मोहम्मद मुर खान पनि दोषी ठहर भएका छन्।उनीहरुमाथी कुल बिगो २३ करोड २० लाख ५९ हजार ३१४ कायम भएकोमा दामासाही आधारमा जनही ५ करोड ८० लाख १४ हजार ८२८ जरिवाना गरिएको छ। त्यसैगरी बाँकी सबै कर्मचारीलाई सफाइ दिइएको छ।
अख्तियारले एमडीएमएस खरिद प्रकरणमा भ्रष्टाचार गरेको दाबी गर्दै दूरसञ्चार प्राधिकरणका पूर्वअध्यक्ष पुरुषोत्तम खनाल, दिगम्बर झालगायत १९ जना र २ कम्पनीविरुद्ध विशेष अदालतमा मुद्दा दायर गरेको थियो।
अख्तियारले प्राधिकरणका दुई पूर्वअध्यक्षसहित पूर्ववरिष्ठ निर्देशक आनन्दराज खनाल, बहालवाला निर्देशकत्रय सुरेन्द्र हाडा, अच्युतानन्द मिश्र र दीपेश आचार्यविरुद्ध भ्रष्टाचार आरोपमा मुद्दा दायर गरिएको थियो।
प्राधिकरणका आन्तरिक लेखापरीक्षण उपनिर्देशक सुरेश बस्नेत, योजना तथा व्यवस्थापन सूचना प्रणाली शाखाका उपनिर्देशक रेवतीराम पन्थ, अनुमतिपत्र व्यवस्थापन शाखाका उपनिर्देशक सन्दीप अधिकारी र कवीन्द्रराज मल्लविरूद्ध अख्तियारले भ्रष्टाचार मुद्दा दायर गरेको थियो।
अदालतमा दायर मुद्दामा २० जनाविरुद्ध ९१ करोड ९८ लाख ३० हजार ८८२ रुपैयाँ बिगो दाबी गरिएको थियो।
याे पनि पढ्नुहाेस्
