नयाँ बजेटबारे शहरी र ऊर्जा मन्त्रालयसँग छलफल, संघीय महत्वका आयोजनमा केन्द्रित हुन अर्थमन्त्रीको आग्रह

अर्थतन्त्र

गृहपृष्ठ
अर्थतन्त्र

नयाँ बजेटबारे शहरी र ऊर्जा मन्त्रालयसँग छलफल, संघीय महत्वका आयोजनमा केन्द्रित हुन अर्थमन्त्रीको आग्रह

क्यापिटल नेपालबिहीबार, फागुन २२, २०८१

काठमाडौं। उपप्रधानमन्त्री एवं अर्थमन्त्री विष्णु पौडेलले संघीय महत्वका आयोजना मात्र संघले गर्ने भएकाले नयाँ बजेटका लागि आयोजना प्रस्तुत गर्दा विशेष ध्यान दिन आग्रह गरेका छन्।

आर्थिक वर्ष २०८२-०८३ को बजेट निर्माणसम्बन्धी शहरी विकास मन्त्रालय र उर्जा, जलस्रोत तथा सिँचाइ मन्त्रालयसँगको छुट्टाछुट्टै छलफलमा मन्त्री पौडेलले संवैधानिक कार्य जिम्मेवारीअनुसार प्रदेश र स्थानीय सरकारको जिम्मेवारी र भूमिकालाई दृष्टिगत गर्दै ठूला आयोजनामा केन्द्रित हुन आग्रह गरेका हुन्। उनले संघीयतामा प्रदेश र स्थानीय तहले गर्ने काम संघले गर्न जरुरी नरहेको बताए।

मन्त्री पौडेलले प्रदेश र स्थानीय तहमा अधिकार र जिम्मेवारी हस्तान्तरण गरेर अघि बढ्दा मात्र संघीयताको अभ्यास बलियो हुने बताएका थिए। उनले तयारीमा रहेका आयोजनाको कार्यान्वयन र आगामी दिनमा आवश्यकपर्ने महत्वपूर्ण आयोजनाको तयारीमा ध्यान पुर्याउन अनुरोध गरे।

उनले विकासलाई नीतिमार्फत पनि सम्बोधन गर्न जरुरी रहेकोमा जोड दिँदै नीतिले थप क्षेत्र खुल्ला गर्ने धारणा व्यक्त गरेका थिए। अहिलेको संसदबाट योभन्दा बलियो सरकार बन्ने सम्भावना नहरेको बताउँदै उनले सबैभन्दा बलियो सरकार भएका सबै पक्षसँग परामर्श गरी देशको आवश्यकता र जनताको चाहनाअनुसार नयाँ बजेट बनाउने दाबी गरे।

शहरी विकास मन्त्रालयसँगको छलफलमा उपप्रधानमन्त्री एवं शहरी विकास मन्त्री प्रकाशमान सिंह, सचिव र विभागीय प्रमुख सहभागी थिए। ऊर्जा मन्त्रालयसँगको छलफलमा उर्जा मन्त्री दीपक खड्का, सचिव, विभागीय प्रमुखहरू सहभागी भएका थिए।

प्रकाशित मिति: बिहीबार, फागुन २२, २०८१ १६:५०

प्रतिक्रिया दिनुहोस्