श्रमिकलाई न्यूनतमभन्दा कम तलब दिए कारबाही गर्ने प्रधानमन्त्रीको चेतावनी

राजनीति

गृहपृष्ठ
राजनीति

श्रमिकलाई न्यूनतमभन्दा कम तलब दिए कारबाही गर्ने प्रधानमन्त्रीको चेतावनी

क्यापिटल नेपालमंगलबार, फागुन २०, २०८१

काठमाडौं। प्रधानमन्त्री केपी शर्मा ओलीले कुनै पनि बहानामा न्यूनतमभन्दा कम पारिश्रमिक दिएर श्रमिकलाई काम लगाएको पाइए कारबाही गर्ने चेतावनी दिएका छन्। नेपाली ट्रेड युनियन आन्दोलनको ७८औँ वार्षिकोत्सव समारोहलाई सम्बोधन गर्दै प्रधानमन्त्री ओलीले यस्तो बताएका हुन्।

नर्सले पनि न्यूनतम पारिश्रमिक नपाइएको उल्लेख गर्दै उनले कुनै पनि बहानामा न्यूनतमभन्दा कम तलब दिएर श्रमिकलाई काम लगाउन नपाइने बताए। श्रमिकको मन प्रशन्न नभइकन उद्योग–व्यवसायका काम सहजरूपमा अघि बढ्न नसक्ने बताउँदै उनले श्रमिक रोजगारदातामा रुपान्तरण हुनसक्ने भएकाले त्यस प्रकारको वातावरण सृजना गर्नुपर्नेमा जोड दिए।

प्रधानमन्त्री ओलीले भने,“अब हामी परिवर्तनको मर्मअनुसार अघि बढ्नुपर्छ। हामीले अन्तरराष्ट्रिय मान्यताअनुसार संवादका माध्यमबाट सरकार, रोजगारदाता र श्रमिकलाई ‘विन विन’ अवस्थामा ल्याउन सक्नुपर्छ। सरकारले तटस्थ बसेर निष्पक्ष निष्कर्ष निकाल्नुपर्छ।”

मिलेर बसेको नेपाली समाजलाई जात, धर्म र संस्कृतिका नाममा विभाजन गर्न खोज्नेविरुद्ध एकजुट भएर लाग्नु पर्ने उनको भनाइ छ। “हामीलाई कसैको अनावश्यक विरोधसँग मतलव छैन। नचाहिने प्रदूषित कुरा हामी बोकेर हिँड्दैनौँ । हामीलाई देशको विकास र परिवर्तन गर्नु छ। विरोधका लागि विरोध गर्ने प्रवृत्ति आफै सेलाएर जान्छ। यसमा मजदूर आन्दोलन विगतदेखि नै सचेत छ भन्नेमा म विश्वस्त छु”, प्रधानमन्त्री ओलीले भने

प्रकाशित मिति: मंगलबार, फागुन २०, २०८१ १५:४६

प्रतिक्रिया दिनुहोस्