काठमाडाैं। नेपाली कांग्रेसकी नेतृ एवम पूर्व उपप्रधान एवम परराष्ट्रमन्त्री सुजता कोइराला नेतृत्वको कांग्रेस प्रतिनिधि र चीनको सिचवान प्रान्तका प्रमुख नेताबीच छेन्दुमा महत्त्वपूर्ण भेटवार्ता भएको छ।
भेटमा आपसी सद्भाव र सहयोग अभिवृद्विसँगै कृषि, शिक्षा, स्वास्थ्य, संचार, पर्यटन लगायतका विषयमा गर्न सकिने सहकार्यबारे समेत छलफल भएको भेटमा सहभागी नेता बर्मा लामाले जानकारी दिए।
नेतृ कोइरालाले लिखित मन्तव्य राख्दै चीन नेपालको एक असल छिमेकी भएको र चीनको चासोको विषयमा कांग्रेस र नेपाल सरकार सदैव सचेत रहेको जानकारी गराइन्। उनले नेपाल र नेपालीको हित र विकासका लागि चीनले पुर्याउँदै आएको सहयोगको पनि सराहना गरिन्।
भेटमा सहभागी नेता लामा, किरण यादव र देवराज चालिसेका अनुसार यो भेटले चिनियाँ कम्युनिस्ट पार्टी र कांग्रेसबिचको सम्बन्ध अझै बलियो बनाउन मद्दत पुग्ने छ।
भेटमा कांग्रेसका १५ जना नेता सहभागी थिए। चीनको तर्फबाट सीपीसी सिचवान प्रान्तका स्थायी कमिटी सदस्य पुबु डुन्झु, सीपीसी सिचवानकै विदेश विभाग निर्देशक झाङ फेनलगायत ८ जना नेता सहभागी थिए।
चिनियाँ नेताहरुले नेपालसँगको साँस्कृतिक सहकार्य र विकासलाई पनि सँगै अघि बढाउन इच्छा व्यक्त गरेका थिए। भेटवार्ताअघि कोइराला नेतृत्वको टोलीले सिचवानको प्रसिद्ध म्युजियम र साँस्कृतिक क्षेत्रको अवलोकन गरेको थियो।
कोइरालासहितको टोली चार दिन छेन्दुमा बसेर बेइजिङ पुग्ने छ। बेइजिङमा पनि चिनियाँ नेतासँग सौहार्दपूर्ण भेटवार्ताको कार्यक्रम रहेको नेतृ कोइरालाले जानकारी दिइन्।
