कार्यविधि र प्रक्रियाअनुसार केयू भिसी छनाेट गर्न समितिलाई ध्यानाकर्षण

समाज

गृहपृष्ठ
समाज

कार्यविधि र प्रक्रियाअनुसार केयू भिसी छनाेट गर्न समितिलाई ध्यानाकर्षण

क्यापिटल नेपालबुधबार, फागुन १४, २०८१

काठमाडौं। काठमाडौं विश्व विद्यालयको उपकुलपति खोज तथा सिफारिस समितिलाई कार्यविधि र प्रक्रियाअनुसार काम गर्न ध्यानाकर्षण गराइएको छ। विश्व विद्यालयका १३ जना डीन तथा एसोसिएट डीनले संयुक्त वक्तव्य जारी गर्दै आफैंले बनाएको कार्यविधि र प्रक्रियाअनुसार काम गर्न ध्यानाकर्षण गराएका हुन्।

‘यस विश्वविद्यालयलाई लामो समय नेतृत्व दिनुभएका संस्थापक प्रा.डा.सुरेश राज शर्मा त्यसको संयोजक रहेको अवस्थाले यो समितिले आफैले बनाएको कार्यविधि र त्यसले माग गरेको प्रक्रिया, छनौटका लागि तय मापदण्ड समेतका आधारमा, तीन जनाको नाम कुलपतिसमक्ष सिफारिस गर्नेमा अन्यथा हुने छैन र सञ्चार माध्यममा आएका कुरा गलत सावित हुनेछन् भन्नेमा विश्वस्त छौं,’ जारी विज्ञप्तिमा भनिएको छ।

उनीहरुले अन्तिम चरणमा पुगेका तीन जनाको नाम समयमै सिफारिस गर्न माग गर्दै ती मध्येबाट एक जना उपकुलपतिमा छिट्टै छनोट गर्नुपर्ने बताए। यस्तै सोही विषयमा विभिन्न सञ्चारमाध्यममा आइरहेका टिप्पणीहरुले आफूहरुको ध्यानाकर्षण भएको उनीहरुको भनाइ छ।

‘प्रक्रियामा सामेल भइ प्रस्तुती र अन्तर्वातामा सम्मिलित भइ आएका उम्मेद्वारहरुले पाएको अंकलाई तोडमोड गरिदै छ, प्रक्रिया सुरु भइसकेपश्चात नाम सिफारिसका लागि वस्तुपरक नदेखिने प्रकारका नयाँ नयाँ सर्त अघि सार्ने काम भएकाले समितिमा अरु सदस्यलाई अप्ठ्यारो परेको छ भन्नेजस्ता सञ्चार माध्यममार्फत प्रेषित भनाइ गलत साबित गरी खोज तथा सिफारिस समिति आफैंले स्वीकृत गरेको प्रक्रिया र मापदण्डमा आधारित भई तीन जनाको नाम यथाशीघ्र छिटो सिफारिस हुनेमा हामी सबै आशावादी छौं,’ ध्यानाकर्षण पत्रमा उल्लेख छ।