काठमाडौं। बिमा प्राधिकरण अध्यक्षमा शरद ओझा नियुक्त भएका छन्। सोमबार बसेको मन्त्रिपरिषद् बैठकले प्राधिकरण अध्यक्षमा ओझालाई नियुक्त गरेको एक मन्त्रीले जानकारी दिए।
यस्तै विद्युत प्राधिकरणका कार्यकारी निर्देशक कुलमान घिसिङलाई हटाउने विषयमा पनि कुनै पनि निर्णय नभएको ती मन्त्रीले बताए।
यसअघि राष्ट्रिय योजना आयोगका उपाध्यक्ष प्रा.डा. शिवराज अधिकारीको नेतृत्वमा गठन भएको अध्यक्ष सिफारिस समिति मन्त्रिपरिषदमा तीन जनाको नाम सिफारिस गरेको थियो। समितिले शरद ओझा, रामशरण पुडासैनी र दामोदर बसौला गरी तीन जनाको नाम सिफारिस गरेको थियो।
तीन जनाको नाम मन्त्रिपरिषदमा सिफारिस गर्नु अगाडि आवेदन दिने आवेदकमध्ये संक्षिप्त सूचीमा पाँच उम्मेदवारलाई छनौट गर्दै कार्ययोजना प्रस्तुतीकरण तथा अन्तर्वार्ताका लागि बोलाइएको थियो।
फागुन १० मा कमलप्रसाद रेग्मी, चिरञ्जीवी चापागाईं, दामोदर बसौला, रामशरण पुडासैनी र शरद ओझासँग अन्तर्वार्ता लिइएसकेपछि समितिले तीन जनाको नाम सिफारिस गरेको थियो।
अध्यक्षमा नियुक्त ओझा सञ्चार, वकालत र कर्पोरेट क्षेत्रमा उच्च व्यवस्थापकीय तहमा रहेर काम गरिसकेका व्यक्ति हुन्। कानुन व्यवसायी तथा व्यवस्थापन कलेजका अध्यापकसमेत रहेका ओझाले नेपाल उद्योग परिसंघ र नेपाल उद्योग वाणिज्य महासंघका लागि विज्ञका रूपमा कार्य गर्दै आएका थिए।
भ्रष्टाचार मुद्दामा निलम्बनमा परेकै बेला सुर्य प्रसाद सिलवालको अध्यक्षको कार्यकाल गत माघ १९ गते सकिएको थियो। त्यसलगत्तै, सरकारले पुस ९ गते आयोगका उपाध्यक्ष अधिकारीको संयोजकत्वमा अर्थसचिव र ज्योतिषचन्द्र ओझा सदस्य रहेको तीन सदस्य समिति बनाएर बिमा प्राधिकरणको अध्यक्षको लागि आवेदन आब्हान गरेको थियो। जसमा अध्यक्ष पदका लागि १२ जनाले आवेदन दिएका छन्।
माघ ११ गतेसम्म आवेदन खुला गरिएको समयमा १२ जनाको आवेदन परेको हो। आवेदन दिने व्यक्तिहरूमा डा. देवराज रोका, शरद ओझा, बुद्धकाजी श्रेष्ठ, दामोदर बसौला, चिरन्जीवी चापागाईँ, डिमप्रसाद पौडेल, विक्रान्त पाण्डे, कमलप्रसाद रेग्मी, रामशरण पुडाशैनी, रमण नेपाल, विष्णुबाबु मिश्र र विनोदकाजी श्रेष्ठ थिए।
