काठमाडौं। प्रतिनिधिसभामा प्रमुख प्रतिपक्ष नेकपा माओवादी केन्द्रले आजदेखि जागरण अभियानको नाम दिएर हुलाकी राजमार्ग केन्द्रित तराई–मधेस जागरण अभियान सुरु गर्दै छ।
माओवादीले झापाको कचनकबलबाट जनतासँग जोडिने उद्देश्य राखेर जागरण अभियान सुरु गर्न लागेको हो।
नेकपा माओवादी केन्द्रका अनुसार अभियानमा जनसभा, चोकसभा, अन्तरक्रिया, जनभेटघाटलगायत कार्यक्रम हुनेछन्। अभियानको नेतृत्व पार्टी अध्यक्ष पुष्पकमल दाहालले गर्नेछन्।
टोलीमा वरिष्ठ उपाध्यक्ष, उपाध्यक्ष, महासचिव र उपमहासचिवका साथै सांस्कृतिक टोली रहनेछन्। सम्बन्धित प्रदेशक, जिल्लाका पार्टीका नेता, जनवर्गीय संगठनका नेताहरू पनि रहने माओवादीले बताएको छ।
कोसी प्रदेशमा झापा, मोरङ, सुनसरीमा कार्यक्रम हुनेछ। मधेसमा सप्तरी, सिराहा, धनुषा, महोत्तरी, सर्लाही, रौतहट, बारा, पर्सामा कार्यक्रम आयोजना गरिनेछ।
यस्तै बागमतीको चितवन, गण्डकीको नवलपुर, लुम्बिनीको नवलपरासी, रुपन्देहीको कपिलवस्तु, दाङ, बर्दिया, बाँकेमा कार्यक्रम हुनेछ।
माओवादी मुख्यालय पेरिसडाँडाका अनुसार सुदूरपश्चिम प्रदेशमा कैलाली र कञ्चनपुरमा कार्यक्रम गरिनेछ।
अभियानमार्फत मुलुकको राष्ट्रिय राजनीतिक परिस्थिति र पार्टीको नीति कार्यक्रमलाई जनस्तरसम्म पुर्याउने, पार्टीलाई जनतासँग जीवन्त रूपमा जोड्ने, पार्टी संगठनलाई स्थानीय स्तरसम्म विस्तार गर्ने, जनताबाट सुझाव संकलन गर्ने, जनता र पार्टी नेतृत्वबीच सम्बन्ध विस्तार गर्नेलगायत उद्देश्य रहेको नेकपा माओवादी केन्द्रले जनाएको छ।
गत पुस २१ देखि २३ सम्म बसेको केन्द्रीय समिति बैठकले जनतामा पार्टी अलोकप्रिय हुन थालेकाले अभियान सुरु गर्ने निर्णय गरेको थियो।
जागरण अभियान चैत ७ गते कञ्चनपुर पुगेर सकिनेछ।
त्यसपछि वैशाखमा पुष्पलाल मध्यपहाडी राजमार्ग केन्द्रित पूर्व–पश्चिम जागरण अभियान सञ्चालन गरिने माओवादी केन्द्रको भनाइ छ।
