काठमाडौं। प्रतिनिधिसभा बैठक आज पनि बस्दै छ।
दिउँसो १ बजे बोलाइएको प्रतिनिधिसभा बैठकमा बैठकमा प्रधानमन्त्री केपी शर्मा ओलीले अख्तियार दुरुपयोग अनुसन्धान आयोगको चौतीसौं वार्षिक प्रतिवेदन आव २०८०÷८१ पेस गर्ने सम्भावित कार्यसूची रहेको संसद् सचिवालयको सूचनामा उल्लेख छ।
त्यस्तै, गृहमन्त्री रमेश लेखकले ‘सशस्त्र प्रहरी बल, नेपाल विधेयक, २०८१ माथि विचार गरियोस्’ भन्ने प्रस्ताव प्रस्तुत गर्नेछन् ।
संसद् सचिवालयका अनुसार शेरबहादुर कुँवरले सुदूरपश्चिम प्रदेश र कर्णाली प्रदेशका केही जिल्लाका विपन्न र पछाडि परेका नागरिकले विभिन्न अस्पतालबाट निःशुल्क सेवा पाउँदै आएकोमा नेपाल सरकार र प्रदेश सरकारबाट प्रदान गरिने अनुदान रकम अभावले सेवाबाट वञ्चित हुने अवस्था आएकोले उक्त अस्पतालबाट पाउँदै आइरहेको सेवाको निरन्तरता हुनुपर्ने भन्ने सार्वजनिक महत्त्वको विषयमाथि स्वास्थ्य तथा जनसंख्या मन्त्रीको ध्यानाकर्षण गर्ने कार्यसूची छ।
उक्त प्रस्तावमाथि दयालबहादुर शाही र पुष्पबहादुर शाहले स्पष्टीकरण माग गर्नेछन्।
राजेन्द्र बजगाईले नेपालका ग्रामीण क्षेत्रमा बाँदर र जंगली सुँगुर ( बँदेल ) को आतंकबाट खेतीबाली नष्ट भई किसानको सुरक्षामा समेत खतरा पैदा भएकाले समस्याको दीर्घकालीन समाधान गर्दै कृषि सुरक्षाको सुनिश्चितता, वन्यजन्तु व्यवस्थापन र वातावरणीय सन्तुलन कायम राख्न नीति निर्माण र कार्यान्वयन आवश्यक भएकाले भन्ने विषयको जरुरी सार्वजनिक महत्वको प्रस्ताव प्रस्तुत गर्ने कार्यसूची रहेको संसद् सचिवालयको सूचनामा उल्लेख छ।
उक्त प्रस्तावका समर्थक उदयशमशेर जबरा र सञ्जयकुमार गौतमले समर्थन गर्नेछन्।
