हिउँले भरियो पाथीभरा, फाइबर छानो बिछ्याइँदा तीर्थयात्रीलाई ढुक्क

पर्यटन

गृहपृष्ठ
पर्यटन

हिउँले भरियो पाथीभरा, फाइबर छानो बिछ्याइँदा तीर्थयात्रीलाई ढुक्क

क्यापिटल नेपालशनिबार, फागुन १०, २०८१

ताप्लेजुङ। ताप्लेजुङको पाथीभरा (मुकुमलुङ) क्षेत्रमा अधिक हिमपात भएको छ। गए राती ३ हजार ७९४ मिटर उचाइमा रहेको पाथीभरालगायत क्षेत्रमा अधिक हिमपात भएको हो।

पाथीभरा क्षेत्र विकास समितिका कर्मचारी तथा स्तानीय राजेन्द्र महतका अनुसार गत पुसमा पहिलो पटक पाथीभरा क्षेत्रमा सामान्य हिमपात भएको थियो। त्यस्तै, फागुनमा दोस्रो पटक सामान्य हिमपात भएको थियो। गए राती भने अधिक हिमपात भएको छ।

महतले भने, ‘यसभन्दा अगाडि भएको हिमपात माथिल्लो फेदीसम्म पुगेको थियो। तर, अहिले हिमपात काफ्ले पाटीसम्म पुगेको छ। यस वर्षकै बाक्लो हिमपात भएको छ।’

पाथीभरा क्षेत्रमा अधिक हिमपात भए पनि पाथीभरा दर्शन गर्न जाने तीर्थयात्रीलाई भने प्रभाव नपरेको पाथीभरा क्षेत्र विकास समितिका कार्यकारी निर्देशक प्रजिन हाङबाङले बताए। उनका अनुसार पाथीभराधामबाट करिब दुई किलो मिटर पदमार्गमा फाइबर छानो लगाइएकाले हिमपात भए पनि तीर्थयात्री सहजै पाथीभारधामसम्म जान सक्नेछन्।

विगतमा हिमपात हुँदा बाटो चिप्लने, पदमार्ग नै हिउले पुरेर नदेखिने हैरानी खेप्नुपरेको थियो। तर, विस्तारै विकास समितिले पदमार्गमा फाइबरको छानो लगाउन थालेसँगै हिमपात तथा पानी पर्दासमेत तीर्थयात्रीलाई सहज भएको स्थानीयको भनाइ छ।

पाथीभारा क्षेत्र विकास समितिका अनुसार आज ३०० जना तीर्थयात्रीले पाथीभरा धाममा पूजापाठ गरेका छन्।-रासस

प्रकाशित मिति: शनिबार, फागुन १०, २०८१ १२:२०

प्रतिक्रिया दिनुहोस्