काठमाडौं। आज फागुन ७ गते। अर्थात्, राष्ट्रिय प्रजातन्त्र दिवस विविध कार्यक्रम गरी नेपालभर मनाइँदै छ।
सहिद दशरथ चन्द, धर्मभक्त माथेमा, गंगालाल श्रेष्ठ र शुक्रराज शास्त्रीले हाँसीहाँसी जीवन उत्सर्ग गरेपछि जनक्रान्तिमार्फत निरंकुश राणा शासन अन्त्य भएको दिनको सम्झना गर्दै विविध कार्यक्रमका साथ आज देशभर प्रजातन्त्र दिवस मनाइन लागेको हो।
प्रजातन्त्र स्थापना भएको ७४ वर्षपछि सार्वभौम नेपाली नागरिकले संघीय लोकतान्त्रिक गणतान्त्रिक व्यवस्थामार्फत आफ्ना अधिकार प्राप्तिको अभ्यास गरिरहेका छन्।
संवैधानिक रूपमा प्रजातान्त्रिक व्यवहार अनुसार नागरिकका अधिकार स्थापित गर्ने कामको बलियो थालनी २००७ को जनक्रान्तिले गरेको र सोही जनक्रान्तिको जगमा टेकेर नेपालमा संघीय लोकतान्त्रिक गणतन्त्र, सङ्घीयता, समानुपातिक, समावेशीसहितको नागरिकलाई अधिकारसम्पन्न बनाउने व्यवस्थाको अभ्यास आरम्भ भएको राजनीतिशास्त्रीहरु बताउँछन्।
देशमा पछिल्लो सात दशकमा विभिन्न चरणमा राजनीतिक परिवर्तन र शासकीयस्वरूपमा रूपान्तरण भए पनि त्यसको आधार २००७ कै क्रान्ति भएको त्रिभुवन विश्वविद्यालय राजनीतिकशास्त्रका पूर्वविभागीय प्रमुख प्राध्यापक डा मीना वैद्य मल्ल बताइन्।
२००७ सालको जनक्रान्तिको जगमा नेपालमा सबै क्षेत्रमा रूपान्तरण आएको र नागरिक तहमा पनि शिक्षाको विकास र चेतनाको विकास भएको उनको तर्क छ।
प्रजातन्त्र दिवस अवसरमा सरकारले आज देशभर सार्वजनिक बिदा दिएको छ भने राष्ट्रपति, प्रधानमन्त्री, सभामुख, राष्ट्रिय सभा अध्यक्ष तथा विभिन्न राजनीतिक दलका शीर्ष नेतृत्वले प्रजातन्त्र दिवसको शुभकामना व्यक्त गरेका छन्।
फागुन ७ मा प्रजातन्त्र स्थापना भएको सम्झनामा प्रत्येक वर्ष सैनिक मञ्च टुँडिखेलमा औपचारिक कार्यक्रम आयोजना गरी प्रजातन्त्र दिवस मनाइँदै आएको छ।
प्रजातन्त्र दिवसका अवसरमा मूल समारोह समितिद्वारा सैनिक मञ्च टुँडिखेलमा आज बिहान आयोजना हुने कार्यक्रममा राष्ट्रपति रामचन्द्र पौडेल सहभागी हुने कार्यक्रम छ।
