काठमाडौं। वाणिज्य बैंकहरूको चालू आर्थिक वर्षको सात महिना (साउनदेखि माघसम्म) कर्जा प्रवाह ५.६२ प्रतिशतले बढेको विवरण नेपाल बैंकर्स संघले सार्वजनिक गरेको छ।
संघले आज सार्वजनिक गरेको विवरणअनुसार चालू आर्थिक वर्षको सात महिनामा वाणिज्य बैंकहरूको निक्षेप अर्थात् बैंकमा जम्मा हुने रकमको तुलनामा कर्जा बढेको हो। २० वटा वाणिज्य बैंकको सात महिनाको निक्षेप ४ दशमलव २१ प्रतिशत बढ्दा कर्जा लगानी ५ दशमलव ६२ प्रतिशतले बढेको संघको तथ्यांकमा उल्लेख छ।
तथ्यांकअनुसार चालु आर्थिक वर्ष २०८१÷८२ साउनदेखि माघसम्म वाणिज्य बैंकहरुको निक्षेपको तुलनामा कर्जा वृद्धि धेरै देखिएको छ। माघसम्म सञ्चालनमा रहेका २० वाणिज्य बैंकको निक्षेप संकलन २ खर्ब ४२ अर्ब रुपैयाँले बढेर ५९ खर्ब ९७ अर्ब रुपैयाँ पुगेको छ।
वाणिज्य बैंकहरुको पछिल्लो सात महिनामा कर्जा लगानी ४८ खर्ब २७ अर्ब र निक्षेप संकलन ५९ खर्ब ९७ अर्ब रुपैयाँ पुगेको छ। असारसम्म बैंकहरूले ५७ खर्ब ५४ अर्ब निक्षेप संकलन र ४५ खर्ब ७० अर्ब रुपैयाँ कर्जा प्रवाह गरेका थिए।
पछिल्लो सात महिनामा निक्षेपभन्दा धेरैले कर्जा विस्तार गर्नेमा ग्लोबल आईएमई बैंक, हिमालयन, लक्ष्मी सनराइज, सिटिजन्स, एभरेष्ट, माछापुच्छ्रे र सिद्धार्थ बैंक रहेका छन्।
संघका अनुसार ग्लोबल आईएमई बैंकको कर्जा लगानी ४ खर्ब २२ अर्ब रुपैयाँबाट बढेर ४ खर्ब ३१ अर्ब र निक्षेप ५ खर्ब २२ अर्ब रुपैयाँबाट बढेर ५ खर्ब २९ अर्ब पुगेको छ। यस्तै, एभरेष्ट बैंकको कर्जा लगानी २ खर्ब ११ अर्ब रुपैयाँबाट बढेर २ खर्ब २० अर्ब र निक्षेप २ खर्ब ५७ अर्ब रुपैयाँबाट बढेर २ खर्ब ६१ अर्ब पुगेको छ।
लक्ष्मी सनराइज बैंकको कर्जा लगानी २२ अर्ब रुपैयाँले बढेर २ खर्ब ८१ अर्ब र निक्षेप १३ अर्बले बढेर ३ खर्ब ४७ अर्ब पुगेको छ । माछापुच्छ्रे बैंकको कर्जा लगानी १२ अर्ब रुपैयाँले बढेर एक खर्ब ४३ अर्ब र निक्षेप ७ अर्बले बढेर एक खर्ब ६८ अर्ब पुगेको छ।
सिद्धार्थ बैंकको कर्जा लगानी १३ अर्ब रुपैयाँले बढेर २ खर्ब १६ अर्ब र निक्षेप १ अर्बले घटेर २ खर्ब ४३ अर्बमा झरेको छ। संघका अनुसार नबिल बैंकले ४ खर्ब ९९ अर्ब रुपैयाँ निक्षेप संकलन र ४ खर्ब ११ अर्ब रुपैयाँ कर्जा लगानी गरेको छ।
एनआईसी एसिया बैंकको कर्जा ३२ अर्ब रुपैयाँले घटेर २ खर्ब ५२ अर्ब र निक्षेप ५८ अर्ब रुपैयाँले घटेर ३ खर्ब दुई अर्बमा सीमित भएको छ।
सिटिजन्स बैंकको कर्जा लगानी ११ अर्बले बढेर १ खर्ब ६८ अर्ब र निक्षेप ९ अर्ब रुपैयाँले बढेर २ खर्ब पुगेको संघले प्रकाशित गरेको विवरणमा उल्लेख छ।
यस्तै, हिमालयन बैंकको कर्जा लगानी ३ अर्ब रुपैयाँले बढेर २ खर्ब ५० अर्ब र निक्षेप ३ अर्बले बढेर ३ खर्ब पुगेको छ। कुमारी बैंकले ३ खर्ब १ अर्ब रुपैयाँ कर्जा लगानी र ३ खर्ब ६१ अर्ब रुपैयाँ निक्षेप संकलन गरेको संघको विवरणमा उल्लेख छ।
पछिल्लो समय कर्जा प्रवाहमा केही सुधारका संकेत देखिए पनि अहिले नै ढुक्क भइहाल्नुपर्ने स्थिति भने नरहेको नेपाल बैंकर्स संघका प्रमुख कार्यकारी अधिकृत अनिल शर्मा बताउँछन्। उनले भने, ‘पछिल्लो समय कर्जा प्रवाह केही बढेको देखिए पनि यसलाई नै आधार मानेर कर्जा प्रवाहमा सुधार भयो भन्न सकिँदैन।’ पछिल्लो केही समयदेखि निक्षेप र कर्जा प्रवाह समानान्तर गतिमा अगाडि बढेको छ। यसलाई सकारात्मक रुपमा लिनुपर्ने हाम्रो धारणा हो।’
-1743570672.jpg)
