काठमाडौं। प्रतिनिधिसभा बैठक नयाँ बानेश्वरस्थित संघीय संसद् भवनमा दिउँसो १ बजे बैठक बस्ने गरी बोलाइएको छ। आजको बैठकका लागि पाँच वटा कार्यसूची रहेको संसद् सचिवालयले जनाएको छ।
आजको बैठकमा प्रधानमन्त्री केपी शर्मा ओलीले ’राष्ट्रिय सुरक्षा परिषदको छैटौं वार्षिक प्रतिवेदन (आव २०७९/२०८०) र सातौं वार्षिक प्रतिवेदन (आव २०८०/२०८१)’ पेस गर्ने कार्यसूची छ।
सभामुख देवराज घिमिरेले नेपाल नागरिकता ऐन (दोस्रो संशोधन) विधेयक, २०८१ माथि सामान्य छलफल गरियोस् भन्ने प्रस्तावलाई निर्णयार्थ प्रस्तुत गर्ने कार्यसूची छ। आइतबार गणपूरक नपुग्दा उक्त प्रस्ताव निर्णयार्थ प्रस्तुत नगरी संसद् बैठक स्थगित भएको थियो।
यस्तै, गृहमन्त्री रमेश लेखकले ’नेपाल प्रहरी विधेयक,२०८१’ माथि सामान्य छलफल गरियोस्’ भन्ने प्रस्ताव प्रस्तुत गर्नेछन्।
बैठकमा ‘राज्य व्यवस्था तथा सुशासन समितिको प्रतिवेदनसहितको राष्ट्रिय सभामा उत्पत्ति भएको भ्रष्टाचार निवारण (पहिलो संशोधन) विधेयक, २०७७ माथि छलफल गरियोस्’ भनी प्रधानमन्त्री ओलीले प्रस्ताव प्रस्तुत गर्नेछन्।
प्रधानमन्त्री ओलीले नै ’भ्रष्टाचार निवारण (पहिलो संशोधन) विधेयक, २०८१ लाई पारित गरियोस्’ भनी प्रस्ताव प्रस्तुत गर्ने कार्यसूची रहेको छ।
श्रम, रोजगार तथा सामाजिजक सुरक्षामन्त्री शरतसिंह भण्डारीले ’अन्तर्राष्ट्रिय श्रम संगठनको अन्तर्राष्ट्रिय श्रम सम्मेलनले स्वीकृत गरेका नयाँ अन्तर्राष्ट्रिय श्रम मापदण्डहरूको संयन्त्र (महासन्धि, प्रोटोकल र सिफारिस)सम्बन्धी प्रतिवेदन’ पेस गर्ने कार्यसूची रहेको सूचना संसद् सचिवालयले सार्वजनिक गरेको छ।
