पाथीभरामा निर्माणाधीन केबलकारको विरोधमा पुनः आन्दोलनको घोषणा

समाज

गृहपृष्ठ
समाज

पाथीभरामा निर्माणाधीन केबलकारको विरोधमा पुनः आन्दोलनको घोषणा

क्यापिटल नेपालसोमबार, माघ २८, २०८१

काठमाडौं। पाथीभरामा निर्माणाधीन केबलकारको विरोध गर्दै आएको समूहले पुनः आन्दोलनको घोषणा गरेको छ। आइतबार र सोमबार दुई दिन वार्तासँगै छलफल भए पनि कुनै निष्कर्ष नआएपछि केबलकारको विरोध गर्दै आएका मुक्कुमलुङ ताङ्सेःप चुम्भोका ११ संस्था र १० वटा अन्तर्दलीय राजनीतिक पार्टीले संयुक्त आन्दोलनको घोषणा गरेको हो।

उनीहरूले माघ २९ गतेदेखि सुरु हुने गरी आन्दोलन घोषणा गरेका छन्। जसअनुसार माघ २९ गतेदेखि फागुन ९ गतेसम्म ग्लोबल आईएमई बैंकसहित आईएमई समूहको बहिष्कार गर्ने, फागुन ६ गतेदेखि ८ गतेसम्म मुक्कुमलुङ बचाऔँ पदयात्रा गर्ने, केबलकारको अनुमति तथा सम्झौता खारेजीका लागि दबाब दिन फुङलिङ नगरपालिकाको कार्यालय घेराउ गर्नेलगायतको कार्यक्रम रहेको छ।

आन्दोलनकारीले अनिश्चित कालीन यातायात बन्दसँगै आमहड्ताल गर्नेसम्मको कार्य तालिका सार्वजनिक गरेको छ। पाथीभरामा केबलकार निर्माण सुरु भएपछि विरोधमा उत्रने क्रममा गत माघ १२ गते प्रहरीसँग झडप भएको थियो। झडपमा प्रहरीको गोली लागेर दुई जना घाइते भएका थिए।