रुपाताल संरक्षणको कामलाई समयमा सक्न मन्त्री खड्काको निर्देशन

पूर्वाधार

गृहपृष्ठ
पूर्वाधार

रुपाताल संरक्षणको कामलाई समयमा सक्न मन्त्री खड्काको निर्देशन

क्यापिटल नेपालबुधबार, माघ २३, २०८१

काठमाडौं। उर्जा, जलस्रोत तथा सिँचाइ मन्त्री दीपक खड्काले रुपाताल संरक्षणको कामलाई सम्पन्न गर्न निर्देशन दिएका छन्। सिँचाइ तथा जलस्रोत व्यवस्थापन आयोजना कास्कीले रुपाताल संरक्षण गर्न गरेको कामको आज बिहान निरीक्षण गर्दै ताल संरक्षणको कामलाई तोकिएको भन्दा चाँडो सम्पन्न गर्न निर्देशन दिए।

'ऐतिहासिक रुपातालको आफ्नै महत्व छ। जनशक्ति थप गरेर समयमै गुणस्तरीय काम गरी यसलाई सम्पन्न गर्नेतर्फ लाग्नुहोस्,' मन्त्री खड्काले भने। रुपाताल संरक्षणका क्रममा बजेट अभाव हुन नदिन मन्त्रालय लाग्ने मन्त्री खड्काको भनाइ थियो।

उक्त तालमा हाल सिँचाइ तथा जलस्रोत व्यवस्थापन आयोजना कास्कीले ५९० मिटर माटो र ४५ मिटर कंक्रिटको बाँध लगाउने काम गरिरहेको छ। १२२ हेक्टर क्षेत्रफलमा फैलिएको उक्त ताल बाँध बाँधेपछि १८३ हेक्टरको हुनेछ।

तालको वरपर पैदल मार्ग निर्माण गर्न ११ सय रोपनी जग्गा अधिग्रहण गर्नुपर्नेमा हालसम्म ९ सय रोपनी जग्गा अधिग्रहण भइसकेको आयोजनाका प्रमुख विदुरमान श्रेष्ठले जानकारी दिए।

तालको अनुगमनमा मन्त्री खड्कासँगै नेपाली कांग्रेसका महामन्त्री एवम् प्रतिनिधिसभा सदस्य विश्वप्रकाश शर्मा, कांग्रेसका सहमहामन्त्री एवम् प्रतिनिधिसभा सदस्य जीवन परियार, कांग्रेस केन्द्रीय सदस्य यज्ञबहादुर थापालगायत नेताहरू पुगेका थिए।

प्रकाशित मिति: बुधबार, माघ २३, २०८१ १४:३१

प्रतिक्रिया दिनुहोस्