रविको मुद्दा न्यायाधीश ढकालको इजलासमा, संगठित अपराधमा मुद्दा नचलाउँदा जिल्ला न्यायाधिवक्तामाथि छानबिन

सहकारी

गृहपृष्ठ
सहकारी

रविको मुद्दा न्यायाधीश ढकालको इजलासमा, संगठित अपराधमा मुद्दा नचलाउँदा जिल्ला न्यायाधिवक्तामाथि छानबिन

क्यापिटल नेपालबुधबार, माघ २३, २०८१

काठमाडौं। सहारा चितवन बहुउद्देश्यीय सहकारी संस्थाको रकम हिनामिना अभियोगमा राष्ट्रिय स्वतन्त्र पार्टी (रास्वपा) सभापति रवि लामिछाने जिल्ला अदालतमा उपस्थित भएका छन्। उनी आज बिहान १० बजे अदालतमा उपस्थित भएका हुन्।

लामिछाने अदालतमा उपस्थित भएसँगै उनको मुद्दा गोलाप्रथाबाट न्यायाधीश दयाराम ढकालको इजलासमा परेको चितवन जिल्ला अदालतका सूचना अधिकारी अमृत विश्वकर्माले बताए।

अदालतमा बयान सकिएसँगै थुनछेक बहस सुरु हुनेछ। सरकारी वकिल कार्यालयले मंगलबार लामिछानेसहित १५ जनाविरुद्ध मुद्दा दर्ता गराएको थियो।

सहारा सहकारीबाट रकम लगेर गएका पाँच कम्पनीमा गोर्खा मिडिया नेटवर्क, नेचर हब इन्टरनेसनल, जिबी ग्रुप अफ कम्पनी, स्प्रिङ उड स्टेट हाउजिङ प्रालि र नेचर नेष्ट रहेको विश्वकर्माले जानकारी दिए। सहारा चितवन बहुउद्देश्यीय सहकारी संस्थाको ठगी भएको भनिएको जम्मा रकम ५२ करोड ३२ लाख ८५ हजार ३०८ रुपैयाँ छ।

यसैबीच सहारा चितवन सहकारी ठगी प्रकरणका प्रतिवादी लामिछानलाई ठगी कसुरमा मात्रै मुद्दा चलाएको भन्दै जिल्ला चितवन जिल्ला न्यायाधिवक्तामाथि छानबिन सुरु भएको छ।

जिल्ला सरकारी वकिलको कार्यालय चितवनका प्रमुख तथा न्यायाधिवक्ता शान्तिप्रसाद लुइँटेलमाथि महान्यायाधिवक्ता कार्यालयले छानबिन अघि बढाएको हो। नायब महान्यायाधिवक्ता गोपालप्रसाद रिजालको नेतृत्वमा छानबिन समिति गठन गरिएको छ।

प्रकाशित मिति: बुधबार, माघ २३, २०८१ १३:०८

प्रतिक्रिया दिनुहोस्