काठमाडौं। नेपालको चेन हस्पिटालिटीमा अग्रणी सिद्धार्थ हस्पिटालिटी २७औं वर्ष प्रवेश गरेको छ। सन् १९९८ मा कैलालीको टीकापुरस्थित सामान्य (खाजाघर)होटलबाट सुरु भएको कम्पनीको यात्रा मुलुकभर फैलिएको छ।
वार्षिकोत्सवका अवसरमा सिद्धार्थ ग्रुपका प्रमुख कार्यकारी अधिकृत (सीईओ) कृष्ण न्यौपानेले मुलुकको पर्यटन प्रवर्द्धन गर्दै सिद्धार्थलाई देशव्यापी बनाउने योजनाका साथ सिद्धार्थ ग्रुपले ‘भिजन २०३०’ मा काम गरिरहेको बताए।
उनले सन् २०३० सम्म स्वदेश तथा विदेशमा समेत गरी कम्तीमा ५८ वटा साना तथा ठूला आउटलेट सञ्चालन गर्ने योजना बनाएको पनि जानकारी दिए। ‘हाल हामी नेपालका विभिन्न स्थानका साथै भारतमा समेत होटल सञ्चालनको तयारी गरिरहेका छौं। त्यसपछि अन्य देशमा पनि सेवा विस्तार गर्ने योजना छ’, उनले भने।
सिद्धार्थ हस्पिटालिटी पछिल्लो वर्षमा आतिथ्य क्षेत्रमा गुणस्तरीयताको पर्याय बनेको छ। यसलाई गत वर्ष प्राप्त विभिन्न सम्मानले पुष्टि गर्ने कम्पनीको भनाइ छ।
गत वर्ष मात्रै पृथ्वी राजमार्गको चुम्लिङटारमा रहेको सिद्धार्थ रिभरसाइड रिसोर्ट दक्षिण एसियाली ट्राभल अवार्ड (साटा)बाट उत्कृष्ट रिभर साइड रिसोर्टको अवार्डबाट सम्मानित भएको थियो। बौद्धस्थित सिद्धार्थ बुटिक होटलले उत्कृष्ट बुटिक होटलका रुपमा साटा अवार्ड प्राप्त गरेको थियो।
सुर्खेतस्थित सिद्धार्थ रिसोर्टले कर्णाली प्रदेश सरकारबाट उत्कृष्ट एचआर प्राक्टिस (मानव संसाधन अभ्यास) अवार्ड प्राप्त गरेको थियो । त्यस्तै विभिन्न आउलेट उत्कृष्ट सेवा र आतिथ्यका लागि ट्राभलर च्वाइस अवार्डबाट समेत सम्मानित भएका थिए।
सिद्धार्थले लुम्बिनी विश्वविद्यालयसँगको सहकार्यमा ब्याचलर इन हस्पिटालिटीमा अध्ययनरत विद्यार्थीलाई सीप सिक्दै पढ्दै अभियान सुरु गरेको छ। साथै सिद्धार्थले सुर्खेतको होटलबाट कर्णालीमा उत्पादन हुने अर्ग्यानिक खाद्यान्न पनि प्रवर्द्धनमा जोड दिँदै आएको छ।
विदेशमा सेवा विस्तारको योजना
मुलुकका विभिन्न स्थानमा सेवा विस्तार गरिरहेको सिद्धार्थ हस्पिटालिटीले अब चाँडै भारतमा पनि सेवा विस्तार गर्दै छ। त्यति मात्रै होइन, धनगढीमा पाँचतारे होटलको योजना अगाडि बढाएको छ।
सिद्धार्थले बुटवलको योगीकुटीमा सिद्धार्थ कटेज सञ्चालन गरेको छ, जसमा वाटर पार्क र यस क्षेत्रकै उत्कृष्ट सभा हल समेत निर्माण हुँदैछ। हाल रेस्टुरेन्टको काम पूरा भई सञ्चालनमा आइसकेको छ भने आगामी असारसम्म बाँकी काम पूरा हुने जनाइएको छ। कम्पनीले धनगढीमै पनि सिद्धार्थ कटेज निर्माण गरिरहेको छ।
पाहुनालाई शान्त वातावरण खुला बगैचा, आधुनिक सुविधासहित रेस्टुरेन्ट र वाटर पार्क साथै यस क्षेत्रकै उत्कृष्ट सभाहलसमेत निर्माण हुँदै छ।
पर्यटकीय गन्तव्य इलाममा पनि कम्पनीको लग्जरी रिसोर्ट निर्माणको योजना बनाएको छ। रिसोर्टमा चियाबगानको दृश्य हेर्न पाइने भिल्ला, अर्ग्यानिक फार्म(टु(टेबल भोजन, वेलनेस कार्यक्रम र सांस्कृतिक अनुभव समावेश हुनेछन्।
हाल सिद्धार्थ हस्पिटालिटीअन्तर्गतका विभिन्न आउटलेटमा दुई हजार ५०० भन्दा बढी कर्मचारी कार्यरत छन्। आतिथ्य क्षेत्रमा सबैभन्दा बढी रोजगारी दिने समूहमध्ये सिद्धार्थ होस्पिटालिटी पनि एक हो।
कम्पनीका हाल पाँचतारे होटल स्तरमा सिद्धार्थ भिलासा, चार तारे स्तरमा सिद्धार्थ वैभव, तीन तारे स्तरमा सिद्धार्थ बाटिका ब्रान्डका होटल सञ्चालनमा छन्। त्यसबाहेक सिद्धार्थ कटेज, सिद्धार्थ क्याफेका साथै पछिल्लो समय कम्पनीअन्तर्गत एस होटल सञ्चालन तयारी भइरहेको कम्पनीले जनाएको छ।
कम्पनीका अनुसार पूर्वमा बिर्तामोडदेखि पश्चिममा महेन्द्रनगरसम्म सेवा प्रवाह गरिरहेको कम्पनीले आफ्नै होटल सञ्चालनका साथै अन्य होटल व्यवस्थापन गरिरहेको छ।
समुदायमा सिद्धार्थ
कम्पनीले वार्षिकोत्सव अवसरमा समुदायको संलग्नतामा विभिन्न कार्यक्रम आयोजना गरेको छ। संस्थागत सामाजिक उत्तरदायित्वअन्तर्गत क्याफेदेखि पाँच तारेसम्म सबै आउटलेटले स्वास्थ्य, सरसफाइ, वातावरण र सामाजिक सहयोगसम्बन्धी क्षेत्रमा देशब्यापी कार्यक्रम सम्पन्न गरेका छन्।
