लागुऔषध कारोबारी समात्न प्रहरीले चलायो गोली, एक जना घाइते

समाज

गृहपृष्ठ
समाज

लागुऔषध कारोबारी समात्न प्रहरीले चलायो गोली, एक जना घाइते

क्यापिटल नेपालशुक्रबार, माघ १८, २०८१

काठमाडौं। पश्चिम नवलपरासीमा प्रहरीले लागुऔषध नियन्त्रणमा लिन चार राउण्ड गोली प्रहार गरेको छ। बिहीबार राति ८ बजे जिल्लाको रामग्राम नगरपालिका १२ पचगाँवा बस्ने राजेश लोनियाको घरबाट लागुऔषध (ब्राउन सुगरजस्तो देखिने धुलो पदार्थ) नियन्त्रणमा लिन प्रहरीले गोली प्रहार गरेको हो।

नवलपरासी जिल्ला प्रहरी कार्यालयका प्रहरी नायब उपरीक्षक एवं सूचना अधिकारी रेशम बोहराका अनुसार लोनियाले बिक्री वितरणका लागि लागुऔषध घरमा राखेको गोप्य सूचनाका आधारमा नियन्त्रण ब्यूरो शाखा कार्यालय भैरहवाबाट प्रहरी नायब निरीक्षक सागर भट्टराईको कमान्डमा उनको घरमा पुगेको थियोर

प्रहरीले परिचय दिएर खानतलासी गर्दा लोनियाले प्रहरीमाथि आक्रमण गर्न खोजेका थिए। अवस्था तनावपूर्ण बनेको र उनी भाग्न खोज्दा प्रहरीले गोली प्रहार गर्दा लोनियाको बायाँ साप्रामा एक राउन्ड गोली लाग्दा उनी घाइते भएको बोहराले बताए।

उनको जिल्लास्थित पृथ्वीचन्द्र अस्पतालमा उपचार भइरहेको र अवस्था सामान्य रहेको प्रहरीले जनाएको छ। सो स्थानबाट ९३ पुरिया ब्राउनसुगर नियन्त्रणमा लिएको सूचना अधिकारी बोहराले बताए। लागुऔषध किनबेचमा संलग्न रहेको अर्का एक जना व्यक्ति फरार भएका छन्।

प्रकाशित मिति: शुक्रबार, माघ १८, २०८१ १०:१९

प्रतिक्रिया दिनुहोस्