कास्की जिल्ला अदालतमा ६५ लाख धरौटी बुझाएका रवि लामिछाने पुगे उच्च अदालत

सहकारी

गृहपृष्ठ
सहकारी

कास्की जिल्ला अदालतमा ६५ लाख धरौटी बुझाएका रवि लामिछाने पुगे उच्च अदालत

क्यापिटल नेपालसोमबार, माघ १४, २०८१

काठमाडौं। राष्ट्रिय स्वतन्त्र पार्टी (रास्वपा) सभापति रवि लामिछाने उच्च अदालत पोखरामा निवेदन दिन पुगेका छन्। जिल्ला अदालत कास्कीले पोखराको सूर्यदर्शन सहकारी ठगीमा रिहा हुन तोकिएको धरौटी बदर गर्न माग गर्दै उनी उच्च अदालत पुगेका हुन्।

कास्कीको सूर्यदर्शन सहकारी ठगीको आरोपमा लामिछानेसँग फौजदारी कार्यविधि संहिताको दफा ६८ बमोजिम ६५ लाख धरौटी मागिएको थियो। उक्त आदेश चित्त नबुझेको भन्दै उनी बदर गर्न दफा ६९ बमोजिम साधारण तारेखमा मुद्दा पुर्पक्ष गराउन उच्च अदालत पोखरामा पुगेका हुन्।

एउटा अदालतको आदेश चित्त नबुझेको खण्डमा माथिल्लो तहको अदालतमा पुनरावेदन गर्न पाउने कानुनी व्यवस्था छ। सोहीअनुसार लामिछाने उच्च अदालतमा निवेदन दिन पुगेका हुन्।

यसअघि लामिछानेले बुटवलको सुप्रिम सहकारी ठगी प्रकरणमा जिल्ला अदालत रुपन्देहीले मागेको १ करोड रुपैयाँ धरौटी बुझाएका थिए। धरौटी रकम बुझाएसँगै उनी रातारात गरी पोखरा पुगेका हुन्।

सुप्रिम सहकारीको रकम संगठित ठगीमा रविसहित २२ जनालाई प्रतिवादी बनाएर जिल्ला अदालतमा पूरक अभियोग पत्र दर्ता गरिएको थियो। पूरक अभियोगमा ५५ करोड ५९ लाख ८३ हजार ८४२ रुपैयाँ बिगो माग दाबी गरिएको छ।

यसअघि लामिछानेलाई स्वर्णलक्ष्मी सहकारी ठगी प्रकरणमा काठमाडौं जिल्ला अदालतले ६० लाख धरौटीमा रिहा गर्न आदेश गरेको थियो।

प्रकाशित मिति: सोमबार, माघ १४, २०८१ १४:१०

प्रतिक्रिया दिनुहोस्