लुम्बिनी। रुपन्देहीको मर्चवार क्षेत्रमा निर्माण भइरहेको विद्युत् सबस्टेसनको काम ४० प्रतिशत पूरा भएको छ। तीन पालिकालाई लक्षित गरी निर्माण भइरहेको मर्चवारस्थित महदेई सबस्टेसन निर्माण सम्पन्न भएपछि क्षेत्रको विद्युत् समस्यामा स्थायी सुधार आउने नेपाल विद्युत् प्राधिकरणले जनाएको छ।
प्राधिकरणका इन्जिनियर जगदीशराज बरालका अनुसार महदेई सबस्टेसनको सिभिल संरचनामा ३५ प्रतिशत र विद्युतीकरणमा ४० प्रतिशत काम सम्पन्न भइसकेको छ। परियोजनाको बाँकी काम एक वर्षभित्र पूरा हुने गरी तीव्र गतिमा अगाडि बढिरहेको उनले बताए।
निर्माण कम्पनीसँग गत फागुनमा सम्झौता भएको उनको भनाइ छ। ‘अब केही दिनमै सकिन लागेकाले म्याद पुनः म्याद थप गरेर आगामी एक वर्षभित्र यो परियोजना पूरा गरी सबस्टेसन सञ्चालनमा ल्याउने योजनामा छौं’, उनले भने।
साइटमा माटो परीक्षण, कागजी प्रक्रिया र विभिन्न सामग्रीको अभावका कारण निर्माण कार्यमा केही ढिलाइ भएको बताउँदै प्राधिकरणका इन्जिनियर बरालले बताए। उनले भने, ‘सबस्टेसन निर्माणका लागि चाहिने अधिकांश सामग्री व्यवस्थापन भइसकेर अहिले सबै काम तीव्र गतिमा अघि बढेको छ।’
निर्माण कम्पनीका योजना प्रबन्धक मुकुल सिंहले परियोजनाको डिजाइनमा ढिलाइ भएकाले निर्माण समयमै पूरा हुन नसकेको बताए। उनले भने, ‘डिजाइन प्राप्त भएपछि ४० जनाको टोलीले तीव्र गतिमा काम गर्दै हालसम्म आठ सय ५० वटा विद्युत् पोलको जडान कार्य सम्पन्न गरिसकेको छ।’
उनका अनुसार अबको केही दिनमै पोलमा तार तान्ने काम गरिनेछ।
तारपोलको व्यवस्थापन भइसकेपछि ट्रान्सफार्मर व्यवस्था गरी लो–भोल्टेज र विद्युत् कटौती समस्या समाधान हुनेछ। बारम्बार बत्ती जानु र लाइन ट्रिप हुनुका कारण उपभोक्ताका दैनिक गतिविधि प्रभावित हुने गरेको सम्मरीमाई गाउँपालिका–७ का वडाध्यक्ष राधेश्याम कुर्मीले बताए। उनले भने, ‘समृद्धिको सम्भावना राख्ने क्षेत्रमा नयाँ विद्युत् संरचना निर्माण र विस्तारका लागि भइरहेका काम ढिलो हुँदै आएका छन्।’
महदेईमा विद्युत् सबस्टेसन निर्माणपछि मर्चवार क्षेत्रका तीनवटै गाउँपालिका सम्मरीमाई, कोटहीमाई र मर्चवारीमा विकासको नयाँ अध्याय सुरु हुने लुम्बिनी प्रदेशसभा सदस्य कन्हैया बानियाँले दाबी गरे।
उनले भने, ‘यहाँ लो भोल्टेज र अनियमित विद्युत् कटौती समस्या विकराल छ। विद्युत् प्रवाहमा गुणस्तरीय सुधारका लागि सबस्टेसनको गुणस्तरीय निर्माण कार्यलाई तीव्रता दिन निरन्तर अनुगमन गरिरहेका छौं।’–रासस
