सहकारी ठगीको मुद्दा दायर भएपछि जिल्ला अदालत रुपन्देही पुगे रवि लामिछाने

समाज

गृहपृष्ठ
समाज

सहकारी ठगीको मुद्दा दायर भएपछि जिल्ला अदालत रुपन्देही पुगे रवि लामिछाने

क्यापिटल नेपालबुधबार, माघ ९, २०८१

काठमाडौं। पूर्वगृहमन्त्री तथा राष्ट्रिय स्वतन्त्र पार्टी (रास्वपा) सभापति रवि लामिछाने जिल्ला अदालत रुपन्देहीमा पुगेका छन्। सहकारी ठगीको मुद्दामा थुनछेक बहस हुने भएसँगै उनी अदालत पुगेका हुन्।

लामिछानेविरुद्धको मुद्दा न्यायाधीश प्रह्लादकुमार योगीको इजलासमा परेको छ। बुटवलको सुप्रिम सहकारीको बचत हिनामिना आरोपको मुद्दामा प्रतिवादी बनाइएका उनी रुपन्देही जिल्ला अदालतमा हाजिर हुन मंगलबार काठमाडौंबाट बुटवल पुगेका थिए।

सरकारी वकिल कार्यालयले सुप्रिम सहकारीको मुद्दामा आइतबार रविसहित १४ जनाविरुद्ध पूरक अभियोग दर्ता गरेको थियो। सुरुमा उक्त सहकारीको बचत अपचलन गरेको अभियोगमा २२ जनाविरुद्ध मात्र मुद्दा दर्ता भएको थियो। रविसहितको नाम जोडिएपछि संगठित अपराधसमेत गरी पूरक अभियोग लगाइएको हो।

लामिछानेको नाममा नक्कली ऋणी खडा गरी सुप्रिम सहकारीबाट दुई करोड रुपैयाँ गोर्खा मिडिया नेटवर्कमा लगिएको आरोप सम्बन्धमा संसदीय छानबिन विशेष समितिले छानबिन गरेको थियो।

लामिछाने यसअघि काठमाडौंको स्वर्णलक्ष्मी सहकारीको मुद्दामा आफैँ काठमाडौं जिल्ला अदालतमा उपस्थित भएका थिए। उनलाई अदालतले ६० लाख धरौटीमा छोडेको थियो भने यसअघि सूर्यदर्शन सहकारीको मुद्दामा कास्की जिल्ला अदालतले ६५ लाख धरौटीमा रिहा गर्न आदेश दिएको थियो।

प्रकाशित मिति: बुधबार, माघ ९, २०८१ १२:२६

प्रतिक्रिया दिनुहोस्