झापा। मेची भन्सार कार्यालयबाट चालू आर्थिक वर्ष २०८१/८२ को ६ महिनामा चिया निर्यात ५५ दशमलव ७० प्रतिशतले बढेको छ। कार्यालयको तथ्यांकअनुसार (साउन–पुस) सम्म २ अर्ब ९५ करोड ९० लाख ३७ हजार बराबरको चिया निर्यात भएको छ।
सोही अवधिमा ११ हजार दुई सय ३२ दशमलव २७ मेट्रिक टन चिया निर्यात भएको मेची भन्सार कार्यालयका सूचना अधिकारी गणपति कँडेलले जानकारी दिए। गत आव २०८०/८१ को सोही अवधिमा १ अर्ब ९० करोड पाँच लाख छ हजार बराबरको चिया निर्यात भएको थियो।
भारतमा चिया उत्पादनमा कमी आएसँगै नेपाली चियाको निर्यात सुखद् पक्ष रहेको चिया उत्पादक संघका अध्यक्ष आदित्य पराजुलीले बताए। चिया निर्यातमा सरकारले सहजीकरण गरिदिने हो भने भारतमा माग बढेकाले चिया निर्यात अझै बढ्ने अध्यक्ष पराजुलीको दाबी छ।
कार्यालयको तथ्यांकअनुसार चालू आव २०८१/८२ को पुससम्म अलैँची निर्यात १६ दशमलव सात प्रतिशतले बढेको छ। चालू आवको ६ महिनामा चार अर्ब ५५ करोड ७० लाख ६९ हजार बराबरको अलैँची निर्यात भएको छ। गत आव २०८०/८१ को सोही अवधिमा तीन अर्ब ९० करोड ५८ लाख ०६ हजार बराबरको अलैँची निर्यात भएको थियो।
कार्यालयको तथ्याङ्कानुसार प्लाइउड २७ दशमलव ९०, सिमेन्ट क्लिंकर चार हजार एक सय ४१, भेनियर सिटको निर्यात दुई सय ३६ प्रतिशतले वृद्धि भएको छ।
यसैगरी फलामे पाता, छुर्पी, अदुवा, काउली, बन्दागोबी, ब्रोकाउली, फलामलगायत वस्तुको निर्यातमा कमी आएको छ। पूर्वी नाकामा रहेको मेची भन्सारबाट चालू आवको ६ महिनामा १३ अर्ब ८४ करोड चार लाख ३९ हजारको मालवस्तु निर्यात भएको छ।–रासस
