काठमाडौँ। विशेष अदालत काठमाडौंले टीकापुर जग्गा अनियमितता प्रकरणमा ८७ जनालाई दोषी ठहर गरेको छ। अदालतका अध्यक्ष टेकनारायण कुँवर र सदस्य तेजनारायणसिंह राई र रितेन्द्र थापाको इजलासले आज उक्त फैसला गरेको हो।
दोषी ठहर हुनेमा टीकापुर नगर विकास समितिका अध्यक्ष नेत्रप्रसाद जोशी, उपसमिति संयोजक गणेशसिंह रावललाई १ वर्ष ६ महिना कैद फैसला गरेको छ।
विशेष अदालतका सूचना अधिकारी यज्ञराज रेग्मीका अनुसार जग्गा किन्ने ११७ जनामध्ये ८७ जनालाई दोषी ठहर गर्दै तीन महिना कैद र जरिवाना हुने फैसला गरेको छ। उक्त जग्गा सबै नगर विकास समितिको नाममा हुने ठहर गरेको छ। केशरबहादुर कुँवर र राजु आचार्यले सफाइ पाएका छन्।
अदालतले दोषी ठहर गरेका सबैलाई डेढ महिना कैद र १३ लाख ७ हजार जरिवाना हुने फैसला गरेको हो। अख्तियार दुरुपयोग अनुसन्धान आयोगले गत माघमा कैलालीको टीकापुर नगर विकास समितिको जग्गा अनियमित ढगले व्यक्तिलाई बाँडेको आरोपमा मुद्दा दायर गरेको थियो।
‘ती जग्गा एवं तह–तह हक हस्तान्तरण भई हाल प्रतिवादी कायम गरिएका जो–जसको नाउँमा रहेको छ, उक्त जग्गासमेत जफत भई टीकापुर विकास समितिकै नाममा कायम हुने ठहर्छ,” फैसलामा भनिएको छ, “जग्गा जफत भएका प्रतिवादीले जग्गा खरिद गर्दा तिरे बुझाएको रकम कानुनबमोजिम सम्बन्धित बिक्रीकर्तासँग दाबी गरी लिन पाउने हुँदा सोतर्फ थप केही बोलिरहनु परेन।”
अख्तियारले नक्कली रसिद बनाई गलत ढंगले सार्वजनिक जग्गा व्यक्तिको नाममा दर्ता गरेको आरोपमा उक्त समितिका अध्यक्ष, पदाधिकारी, कर्मचारी र जग्गा पाउने व्यक्तिविरुद्ध मुद्दा दायर गरेको थियो।
