काठमाडौं। चितवन र धादिङमा उत्पादित तरकारी एवं फलफूल खेर जान नदिन एग्रीवस्तु चिस्यान केन्द्रले किसानसँग सहकार्य गर्दै उत्पादन खरिद र भण्डारण सुरु गर्ने भएको छ। चिस्यान केन्द्रले पहिलो चरणमा ५ सय मेट्रिक टन (५ हजार क्विन्टल) गाजर खरिद गरी बजारमा पठाउने र भण्डारण गर्ने तयारी छ।
भाटभटेनी सुपर मार्केटद्वारा प्रवर्द्धित एग्रीवस्तु कोल्ड स्टोरले किसान, किसान समूह, र कृषि सहकारीसँग समन्वय गर्दै सिधै तरकारी खरिद गर्न थालेको भाटभटेनीका चिफ अपरेटिङ अफिसर पानु पौडेलले जानकारी दिए।
चिस्यान केन्द्रका प्रबन्ध निर्देशक आशीष शर्माका अनुसार चितवन र धादिङे किसानका लागि यो पहलले ठूलो राहत पुर्याउनेछ।
‘चितवन तरकारी उत्पादनका लागि प्रख्यात छ। तर, आधुनिक चिस्यान केन्द्रको अभावमा किसानले उत्पादन खेर फाल्नुपरेको समस्या समाधान गर्न पहिलो चरणमा गाजर खरिद गर्न लागेका छौं’, शर्माले भने।
तरकारी मात्र नभई चिस्यान केन्द्रले हाल सुन्तला र जुनारको बिक्री वितरण र भण्डारणसमेत सुरु गरेको छ । करिब २ सय मेट्रिक टन सुन्तला र जुनार स्याङ्जा, पाल्पा, गोर्खा र सिन्धुलीलगायत जिल्लाबाट खरिद गरिएको छ। खरिद गरिएका फलफूल र तरकारी प्रशोधन गरेर मात्रै बजारमा पठाइने व्यवस्था गरिएको शर्माले जानकारी दिए।
किसानलाई बजारसँग जोड्ने उद्देश्यका साथ एग्रीवस्तुले विभिन्न जिल्लाहरूमा यस्ता गतिविधि विस्तार गर्ने तयारी गरेको छ। हाल भाटभटेनी सुपर मार्केटसँग सहकार्य गरी उपभोक्तालाई ताजा र स्वास्थ्यकर तरकारी तथा फलफूल आपूर्ति गर्ने योजना अघि सारिएको छ।
‘किसानले आफ्नो उत्पादनका लागि सुनिश्चित बजार पाउनुका साथै उत्पादन खेर जाने समस्या समाधान हुनेछ। अर्कोतर्फ, उपभोक्ताले ताजा र स्वास्थ्यकर तरकारी तथा फलफूल प्राप्त गर्न सक्नेछन्। ‘किसानलाई आर्थिक रूपमा सबल बनाउँदै आम उपभोक्तालाई स्वास्थ्यकर तरकारी उत्पादन आपूर्ति गर्ने हाम्रो उद्देश्य हो,’ शर्माले थपे।
भाटभटेनीका सीओओ पौडेलले पनि किसानको उत्पादन सिधै भाटभटेनीका सबैजसो स्टोरबाट उपलब्ध हुने बताए। चिस्यान केन्द्रले उत्पादक र उपभोक्ताबीचको दूरी घटाउँदै दुवै पक्षलाई लाभ पुर्याउने अपेक्षा गरिएको छ।
सुन्तला, जुनार र तरकारी उत्पादनको यस्तो व्यवस्थापनले जिल्लाका कृषकको आत्मविश्वास बढाउनुका साथै कृषिमा नवप्रवर्तन गर्ने सम्भावना देखाएको आम उपभोक्ताको बुझाइ छ।
दुर्गम तथा अति दुर्गममा फल्ने रैथाने कृषि उत्पादनहरू पनि सीधै कृषकबाट खरिद गरेर एग्रीवस्तुले प्रशोधन तथा प्याकिङ गरी बिक्री वितरण सुरु गरेको प्रबन्ध निर्देशक शर्माले बताए।
