बूढानीलकण्ठ–टोखा जोड्ने विष्णुमती करिडोरको ट्रयाक शिलान्यास

पूर्वाधार

गृहपृष्ठ
पूर्वाधार

बूढानीलकण्ठ–टोखा जोड्ने विष्णुमती करिडोरको ट्रयाक शिलान्यास

क्यापिटल नेपालशनिबार, पुस २०, २०८१

काठमाडौं। काठमाडौं क्षेत्र–५ को बूढानीलकण्ठ र टोखा नगरपालिका जोड्ने विष्णुमति करिडोरको ट्रयाक खोल्ने कार्य सुरु भएको छ। काठमाडौं क्षेत्र– ५ का सांसद एवं स्वास्थ्य तथा जनसंख्यामन्त्री प्रदीप पौडेलले ट्याक खोल्ने कार्यको शिलान्यास गरे।

हाल संघीय सरकारबाट १ करोड विनियोजन गरी सुरु भएको करिडोरको कामका लागि बजेट वृद्धिमा समेत सघाउने मन्त्री पौडेलले प्रतिबद्धता जनाए। करिडोर खुल्न नसक्दा विकासको काम पछि परेको भन्दै मन्त्री पौडेलले आफूले नागरिकको दुःख पीडा देखेरै त्यसलाई कम गर्न पहल गरेको बताए।

‘यस करिडोरले दुवै तहको विकास र समृद्धिमा योगदान पुग्नेछ,’ मन्त्री पौडेलले भने, ‘नागरिकको विकास आवश्यकता पूरा गर्न मेरो सदैव साथ रहनेछ।’

बूढानीलकण्ठ क्षेत्रमा सडक डिभिजन विभागबाट सडक विस्तार हुनेछ। यसैगरी टोखा नगर क्षेत्रको करिडोरमा काठमाडौं उपत्यका विकास प्राधिकरणमार्फत सडक विस्तारको काम सुरु भएको छ। हाल बूढानीलकण्ठको धनेश्वर धन्ने ढिकुरो क्षेत्रबाट सुरु करिडोरको ट्रयाक स्कोन मन्दिरसम्म पुर्याउने लक्ष्य छ।

प्रतिनिधिसभा सदस्य निर्वाचनका क्रममा मन्त्री पौडेलले सांसदका रुपमा आफू निर्वाचित भएमा करिडोरको काम अघि बढाउने घोषणा गरेका थिए।

शिलान्यास कार्यक्रममा बागमती प्रदेशका खानेपानी तथा सिँचाइमन्त्री श्यामबहादुर खड्का, बूढानीलकण्ठका मेयर मीठाराम अधिकारी तथा टोखा नगरका मेयर प्रकाश अधिकारी सहभागी थिए।

प्रकाशित मिति: शनिबार, पुस २०, २०८१ ११:४७

प्रतिक्रिया दिनुहोस्