बैंकिङ

ऋण असुल्न सम्पत्ति लिलामी गरेको समाचारप्रति सिद्धार्थ बैंकको खण्डन

क्यापिटल नेपालबुधबार, पुस १७, २०८१

काठमाडौं। सिद्धार्थ बैंकले विभिन्न सञ्चारमाध्यममा प्रकाशन भएको ‘जनकपुर शाखाका शाखा प्रबन्धक अर्णबहादुर बलम्पाकी पक्राउ’ र ‘बैंकको ऋण असुली प्रक्रियामा अनियमितता’सम्बन्धी समाचारप्रति ध्यानाकर्षण गरेको छ।

बैंकले मंगलबार विज्ञप्ति जारी गर्दै ग्राहक, सरोकारवाला र सर्वसाधारणमा यस समाचारले भ्रम सिर्जना गरेको र सत्यतासँग मेल नखाएको जनाएको छ। बैंकका अनुसार क्षीरेश्वर र जनकपुर शाखाबाट ऋण लिएका ग्राहकहरूले समयमै साँवा र ब्याज भुक्तानी नगरेपछि कानुनी प्रक्रियाअनुसार धितो लिलामको प्रक्रिया अघि बढाइएको थियो। प्रक्रिया पूरा गरी सफल बोलकबोलकर्तालाई सम्पत्ति हस्तान्तरण गरिएको थियो।

केही व्यक्तिहरूले ऋणीरजमानतीसँग मिलेर विरोध जनाएका थिए। उनीहरूले पुस ११, १२ र १४ गते बैंकका कार्यालयमा नाराबाजी गरी सेवा अवरुद्ध गरेका थिए। यसपछि स्थानीय सुरक्षा निकायसँग समन्वय गरी छलफलका लागि प्रहरी कार्यालयमा बैठक बसेको थियो।

याे पनि पढ्नुहाेस्

ॠणीलाई थाहा नदिई धितो लिलाम गरेपछि सिद्धार्थ बैंकका प्रबन्धक पक्राउ

प्रहरी कार्यालयमा छलफलका क्रममा खिचिएको भिडियोको आधारमा शाखा प्रबन्धक पक्राउ परेको झुटो समाचार फैलाइएको बैंकले जनाएको छ। बैंकले यो जानकारी गलत भएको र ऋण असुली प्रक्रिया कानुनी रूपमा अघि बढाइएको स्पष्ट पारेको छ।

कानुनी प्रक्रियातर्फ नगई बैंकजस्तो संवेदनशील संस्थाको सेवा अवरुद्ध हुने गरी बाधा व्यवधान सिर्जना गर्नु उचित नहुने बैंकको धारणा रहेको छ। साथै बैंकजस्तो अत्यावश्यकीय सेवा प्रदान गर्ने संस्थाको सेवा निर्वाध रूपमा सञ्चालन हुने वातावरण निर्माणका लागि सम्बन्धित सबैमा बैंकले अनुरोधसमेत गरेको छ।

प्रकाशित मिति: बुधबार, पुस १७, २०८१ १२:४४

प्रतिक्रिया दिनुहोस्